Birangiye Tschabalala wifuzwaga na Kiyovu yerekeje muri Rayon Sports

Hussein Shaban “Tchabalala” wakiniraga Amagaju yasinye amasezerano y’amezi atandatu muri Rayon Sports iguze amasezerano ye miliyoni 5,5 FRW aho aje gufasha iyi kipe mu bikombe by’imbere mu gihugu na CAF Champions League.

Learn how to Thrive

Nyuma y’igihe bivugwa, Tchabalala wari utegerejwe kuri uyu wa Gatatu mu myitozo ya Rayon Sports yaraye i Kigali maze ibiganiro n’iyi kipe yatwaye igikombe cya shampiyona ku gicamunsi cyo kuri uyu wa Kane.

Aganira n’Izubarirashe, Itangishaka Bernard “King”, Umunyamabanga wa Rayon Sports yemeje ko ibiganiro byarangiye uyu rutahizamu asinye amezi atandatu [gusoza shampiyona].

Yagize ati “Tchabalala asinye muri Rayon Sports azasoza shampiyona, ibyavugwaga ko yaguranwa Mugisha Gilbert si byo nawe araguma hano.”

Bivugwa ko uru tutahizamu w’Umurundi azajya ahembwa ibihumbi 500 FRW buri kwezi aho Rayon Sports yaguze amasezerano y’amezi atandatu yari asigaye kuri miliyoni 5, 5 FRW uyu akaba yahawe miliyoni 2 FRW.

Mu kiganiro Tchabalala yagiranye na Izubarirashe yavuze ko yishimiye gusinya muri Rayon Sports aho yiteze gutsinda ibitego byinshi aho yari ari byamusabaga nko gusubira inyuma ashaka imipira.

Yagize ati “ Sinasinye igihe gito kuko mu masezerano yanjye birimo ko dushobora kuganira bikongerwa, niteguye gukora cyane nkabona umwanya nkatsinda ibitego byinshi, muri Rayon Sports harimo abakinnyi benshi bamfasha kandi bamwe dukinana mu ikipe y’igihugu.”

Tchabalala yashakwaga kandi na Kiyovu Sports yanabanje kumuganiriza ikagenda gake mu biganiro.

PNG - 891.6 kb
Tschabalala wifuzwaga na Kiyovu akaba yahisemo kwerekeza muri Rayon Sports


Nubwo yamaze amezi abiri yaravunitse, Hussein ‘Tchabalala’ Shaban yatsinze ibitego 12 muri shampiyona ya 2016-2017, muri uyu mwaka wa 2017-2018 ku munsi wa 10 ntaratsinda nibura ibitego bitatu.

Uyu yiyongereye ku Munyamali Ismailla Diarra wabonye ibyangombwa bivuye muri Darling Club Motema Pembe yo muri Repubulika Iharanira Demokarasi ya Congo. Gusa aba bazemererwa gukina shampiyona ubwo hazaba hatangiye imikino yo kwishyura.

Aba ni bamwe mu bategerejweho gufasha Rayon Sports mu mikino ya CAF Champions League mu cyumweru cya mbere cya Gashyantare aho bazakina na Lydia Lydic y’i Burundi.

Tchabalala abaye umunyamahanga wa gatanu muri Rayon Sports nyuma ya Kwizera Pierrot, Nahimana Shassir b’i Burundu n’Abanyamali Tidiane Kone na Ismailla Diarra. Muri shampiyona n’igikombe cy’amahoro hemerwa abanyamahanga batatu ariko mu mikino ya CAF ikipe ikinisha abo ishaka.

Shampiyona y’u Rwanda izasubukurwa muri Gashyantare, Rayon Sports ikina na APR FC mbere yo kujya mu mikino nyafurika.

Daniel MUKESHIMANA/Umubavu.com


Travel for Free!


Tanga igitekerezo kuri iyi nkuru



Igitekerezo