Arsene Wenger afite ikizere ko Sanchez na Ozil bazaguma muri Arsenal mu kwa mbere

Arsene Wenger, watangiye imirimo ye yo gutoza ikipe ya Arsenal mu kwezi k’Ukwakira mu mwaka wa 1996, aravuga ko Alexis Sanchez na Mesut Ozil batazava muri iyi kipe nyuma y’ukwezi kwa mbere ngo keretse mu gihe haba habaye ikintu kidasanzwe.

Amasezerano y’aba bakinyi bombi azarangirana n’uyu mwaka wa 2017 bivuze ko umwaka utaha bazaba bemerewe kwerekeza aho bashaka kandi bigurisha.
Abajijwe niba mu by’ukuri yumva Alexis Sanchez na Mesut Ozil bazaguma mu ikipe ya Arsenal abereye umutoza , Wenger yasubije mu magambo makeya cyane agira ati "yego cyane".

Arsene Wenger ukomoka mu gihugu cy’u Bufaransa yavuze kandi ko ashyigikiye ko umukinnyi we wo hagati Jack Wilshere ko nawe aguma mu irushanwa ry’umupira w’amaguru ryo mu gihugu cy’u Bwongereza.

Wenger mu magambo ye ati " Nzakora uko nshoboye kose mu kumurwanira kugira ngo agume aha kuko ari umukinnyi mwiza ufite ubuhanga bukomeye."

Umukinnyi Wilshere w’imyaka 25 y’amavuko yagiye agira ibibazo byo gukomereka kuva agiye muri Arsenal mu ntangiriro z’umwaka wa 2008, akaba yaramaze umwaka wa 2016-2017 yaratijijwe ikipe ya AFC Bournemouth.

Umukinnyi w’imbere wo mu gihugu cya Chili, Sanchez we yaje mu ikipe ya Arsenal avuye muri Barcelone mu mwaka wa 2014,kuri ubu akaba amaze gutsinda ibitego 56 mu mikino 113, mu gihe mugenzi we w’umudage Ozil amaze gufasha ikipe ye gutsinda ibitego 45 kuva mu ntangiriro z’ukwezi kwa cyenda mu mwaka wa 2013, kurusha undi mukinnyi wese wo mu irushanwa ryo mu Bwongereza (Premier League).

Sanchez w’imyaka 28 na Ozil w’imyaka 29, ni abakinnyi bafatwa nk’inkingi za mwamba ku mutoza Wenger kuko bose hamwe bamazwe gutsindira ikipe ye ya Arsenal ibitego bigera kuri 149.

Arsene Wenger atangaje ibi mu gihe itangazamakuru ridasiba kuririmbva ko aba basore byanga byakunda bazava muri iyi kipe mu kwezi kwa mbere ubwo amasezerano yabo azaba arangiye. Ibi bitangazwa kandi hagendewe ko hari amakipe menshi adasiba kugaragaza ko ashaka aba basore kandi akabaha byose baburiye mu ikipe ya Arsenal.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo