Agashya : Muri Nigeria hashyizweho umukozi ushinzwe ibyishimo n’abakundana

Rochas Okorocha, umuyobozi wa Leta ya Imo muri Nigeria yatangaje abantu benshi nyuma yuko ahaye mushiki we witwa Ogechi Ololo akazi ko kuba umuyobozi ushinzwe ibyishimo no kugenzura ko abakundana bo muri Leta ayoboye bagera ku byo bifuza kandi bakaba banezerewe.

Ku wa mbere tariki ya 04 Ukuboza 2017 nibwo uyu muyobozi wa Leta ya Imo witwa Rochas Okorocha yashyizeho uyu mwanya w’ubuyobozi ahita awushyiramo mushiki we witwa Ogechi Ololo ngo ari we ukora izo nshingano.

PNG - 549.9 ko
Rochas Okorocha, umuyobozi wa Leta ya Imo muri Nigeria


Uyu muyobozi mushya nawe yarahiriye hamwe n’abandi bayobozi bashya 27 bahawe inshingano zitandukanye muri Leta ya Imo iherereye mu majyepfo y’uburasirazuba bwa Nigeria.

PNG - 597.8 ko
Ogechi Ololo wahawe akazi ko kuba umuyobozi ushinzwe ibyishimo no kugenzura ko abakundana bagera ku byo bifuza


Amaze guhabwa izi nshingano, Ogechi Ololo yagiriye inama abatavuga rumwe kuri izi nshingano yahawe ababwira ko bagomba guceceka nkuko ikinyamakuru NAIJA cyabyanditse.

Nyuma yo kumva ko uyu mu Guverineri yashyizeho uyu mwanya akawuha mushiki we, abantu banyarukiye ku mbuga nkoranyambaga bavuga byinshi banenga kandi bibaza icyo uwo mukozi azakora.

Bamwe bati : “Ese ubwo ko mwashyizeho ushinzwe gukurikirana abakundana, abadafite abakunzi bo ntimubahejeje inyuma ? ntibakeneye kwishima se ?”

Abandi na bo bati : “hakwiye gushyirwaho uzamwungiriza ushinzwe ibyishimo by’abadafite abakunzi.” Havuzwe byinshi ariko byose biganisha ku kunenga izo nshingano nshya.

Abantu benshi baribaza inshinga uyu mukozi azuzuza bikabayobera, ubusanzwe uyu mugore wahawe izi nshingano ngo yari umujyanama wihariye wa musaza we mu bijyanye no gukemura ibibazo byo mu ngo.

Guverineri Okorocha nyuma yo kurahiza aba bakozi barimo n’uyu ushinzwe ibyishimo n’abakundana yabasabye kwirinda ruswa, ubunebwe n’imikorere idahwitse.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo