Abatoza ba Rayon   bikomye  rutahizamu wabo   Caleb

Rutahizamu w’umurundi Bimenyimana Bonfils Caleb ashobora kwisanga yatakaje umwanya wo kubanza mu kibuga mu ikipe ya Rayon Sports nyuma yo kugenda yitwara nabi mu mikino ya shampiyona iyi kipe imaze gukina muri uyu mwaka.

Uyu musore waje muri Rayon Sports uyu mwaka avuye mu ikipe ya Vital’o mu gihugu cy’u Burundi, aje gusimbura umukinnyi Nshuti Savio Dominique, akomeje kugaragaza urwego ruri hasi muri iyi kipe isaba byinshi hano mu Rwanda.

Uyu mukinnyi akiza mu ikipe ya Rayon Sports yacaga ibintu mu mikino ya gicuti ndetse anagurwa vuba vuba n’ubuyobozi bw’ikipe nyuma yaho abatoza ba Rayon Sports batangarije ko bashimye uko uyu musore ari kwitwara.

Uko iminsi yicuma uyu mukinnyi wavuye i Burundi atarabasha kwemeza n’abakurikirana shampiyona yaho benshi, ari kugenda agaragaza ko urwego rwe rutari ku ikipe nka Rayon Sports.

Ndikumana Hamad Katauti, umutoza wngirije wa Rayon Sports yagize ati " Twamuhaye amahirwe menshi kimwe n’abandi bakinnyi bakina basatira izamu, ariko biragaragara ko nta kinini ari gukora ku buryo mu minsi iri mbere turaza gufata ibindi byemezo."

" Biragaragara ko ibyo tumubwira atabishyira mu bikorwa ku buryo bukwiriye. Turaza kwicara dufate icyemezo, n’abandi babe batangira kubanza mu kibuga, atagize icyo ahindura yakwisanga ku ntebe mu minsi iri mbere."

Bonfils Caleb amaze gutsinda igitego 1 rukumbi ku mukino wa mbere wa shampiyona wahuje Rayon Sports na AS Kigali, akaba ari igitego yatsinze kuri Penaliti.

JPEG - 104.7 ko
Iki gitego Caleb yaragihushije

Uyu mukinnyi ukina nk’umunyarwanda, yari yitezweho byinshi mbere y’uko shampiyona itangira, ariko ibyo yerekana mu kibuga birahabanye. Umukino wahuje Kirehe na Rayon Sports ku wa gatandat w’icyumweru gishize, yavuye mu kibuga ku munota wa 56 adateye mu izamu ishoti na rimwe.



Tanga igitekerezo kuri iyi nkuru



Igitekerezo