Abahanzi basohora amashusho y’indirimo zamamaza ubusambanyi bagiye gukanirwa urubakwiriye

Kimwe n’ahandi ku isi nubwo byirengagizwa, ubuyobozi bw’ikigo gishinzwe kugenzura ikwirakwizwa ry’amashusho mu gihugu cya Kenya cyafashe icyemezo cyo guhagarika gukina indirimbo ya Sauti Sol yitwa Melanin mu igihugu cyose. Iyi ndirimbo yamaganywe bikomeye kubera uburyo igaragaramo abakobwa bambaye ubusa.

Ni nyuma y’iminsi mikeya iyi ndirimbo yakozwe itsinda ry’abaririmbyi rya Sauti Sol rifatanyije n’umuhanzi wo muri Nigeria Patoraking ishyizwe hanze amashusho yayo bikagaragara ko nta butumwa bwafasha abanyagihugu burimo uretse kwamamaza ubusambanyi gusa.

Kuva iyi ndirimbo yajya hanze, amashusho yayo yakomeje kwijujutirwa n’abantu batari bake bagaragazaga ko batayishimiye na gato kubera abakobwa bayigaragaramo bambaye utwenda tw’imbere gusa. Iyo urebye iyi ndirimbo, hari n’ahagaragara umukobwa wambaye ubusa buri buri wikinze utuntu ku myanya ye y’ibanga.

Izi mpamvu zose zigaragazwa n’aba bantu batandukanye nizo zahagurukije ubuyobozi bw’ikigo gishinzwe kugenzura ikwirakwizwa ry’amashusho mu gihugu cya Kenya kinafata icyemezo cyo guhagarika ikinwa ry’iyi ndirimbo gishingiye ko amashusho yayo ahonyora umuco w’igihugu cyane ko nko kuyereka abana kwaba ari ukubatoza imico mibi ishobora kubashora mu ngeso mbi zirimo n’iz’ubusambanyi.

Ezekiel Mutua, umuyobozi w’ikigo gishinzwe kugenzura ikwirakwizwa ry’amashusho mu gihugu cya Kenya yemeza ibi avuga ko bidakwiye ko bakomeza guha urubuga inzira zishobora gutuma umuco w’igihugu utakara.

Uyu muyobozi yavuze ko nyuma yo kumva abantu bijujutira iyi ndirimbo, nawe ubwe yafashe umwanya akareba amashusho yayo akabona uduce tumwe na tumwe tuyagize duhabanye n’ibyo umuco wa Kenya wemera ndetse ko aya mashusho akwiye kurebwa mu masaha akuze y’ijoro gusa.

Ezekiel yakomeje avuga ko aya mashusho azayashyikiriza impuguke zikemeza niba akwiye gutambuka cyangwa niba yahagarikwa burundu.

Si ubwa mbere itsinda rya Sauti Sol rikoze amashusho y’indirimbo agahagarikwa kuko no mu mwaka wa 2014 hahagaritswe amashusho y’indirimbo bakoze yitwa "Nishike" kubera amashusho y’urukozasoni yagaragaragamo.

Reba Videwo y’iyi ndirimbo yahagaritswe

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo