APR FC iheruka guha gasopo Rayon Sports yahagamwe na Miroplast FC ya nyuma

Ikipe ya APR FC iheruka gutsinda Rayon Sports FC igitego kimwe ku busa abenshi bise kuyiha gasopo dore ko yari iyitsinze ubugira kabiri, yari yakiriye Miroplast FC iri ku mwanya wa nyuma ku rutonde rusange birangira banganyije ubusa ku busa, uretse kuba ku mwanya wa nyuma, Miroplast ikaba inafite ibibazo by’imishahara ariko bitayibujije kwihagararaho imbere ya APR FC.

Kuri uyu wa Gatatu tariki 28 Gashyantre 2018, kuri Sitade ya Kigali i Nyamirambo, ikipe ya APR FC yari yakiriye Miroplast mu umukino w’umunsi wa 12 wa shampiyona. APR FC yari yaruhukije abakinnyi basanzwe babanzamo barimo Ombolenga Fitina, Rugwiro Herve na Issa Bigirimana kongeraho Hakizimana Muhadjili wari ufite ikarita y’umutuku yahawe ku mukino batsinzemo Rayon Sports.

APR FC yatangiye isatira cyane, abakinnyi nka Nshuti Innocent na Itangishaka Blaise batangirana umurego ariko abakinnyi b’inyuma ba Miroplast baba ibamba, igice cy ambere kirangira ari ubusa ku busa ndetse nta na byinshi impande zombi zagaragaje kuko n’imipira y’imiterekano APR FC yabonaga yayiteraga hanze cyangwa mu maboko y’umuzamu.

Mu gice cya kabiri, APR FC yatangiranye impinduka Sekamana Maxime asimbura Iranzi Jean Claude naho Miggi asimbura Itangishaka Blaise, maze iyi kipe itangira gusatira cyane mu buryo bugaragara ariko abakinnyi ba APR FC ntibagira igitego babona imbere y’izamu rya Miroplast kugeza umukino urangiye.

Iyo APR FC iramuka itsinze Miroplast yari kurara ku mwanya wa mbere dore ko ikipe zari ziyoboye urutonde rwa shampiyona kuri uyu wa Kabiri 27 Gashyantare 2018 zose zatakaje amanota, Kiyovu Sports yanganyije na Kirehe FC naho AS Kigali inganya na Police FC ibitego bibiri kuri bibiri. Muri rusange, imikino yo ku munsi wa 12 wa shampiyona, amakipe menshi yaranganyije agabana amanota.

Dore uko imikino y’umunsi 12 yaraye igenze:

APR FC 0 - O Miroplast FC 0
Mukura VS 1 -1 Marines FC
Sunrise FC 1 – 1 Amagaju FC
Bugesera FC 0 - 0 Etincelles FC

Kuri uyu munsi hateganyijwe imikino ikurikira:

Gicumbi Fc vs Rayon Sports Fc (Gicumbi, 15:30)
Espoir Fc vs Musanze Fc (Rusizi, 15:30)

Daniel MUKESHIMANA/Umubavu.com


Travel for Free!


Tanga igitekerezo kuri iyi nkuru



Igitekerezo