Papa Francis yasabye abakirisitu gusaba imbabazi abatinganyi

Umushumba wa Kiliziya Gatolika ku Isi, Papa Francis yasabye abakirisitu gusaba imbabazi abatinganyi ndetse n’abandi bose bahohotewe na Kiliziya.

Papa Francis yakomoje ku kibazo cy’abatinganyi n’uburyo bakwiye gufatwa, nyuma yo gukorera urugendo rwe rwa gishumba muri Armenia, aho yavuze kuri Jenoside n’ibindi bibazo bitandukanye byugarije Isi mu kiganiro yagiranye n’abanyamakuru.

Yagize ati “Nsubiyemo ibyo iyobokamana rya Kiliziya Gatolika ryigisha, abatinganyi ntibagombye guhezwa, gutotezwa, bagomba kubahwa bagaherekezwa bya gishumba.”

Yakomeje agira ati “ Kiliziya ikwiye gusaba imbabazi ko ititwaye neza kenshi muri icyo kibazo. Iyo mvuze kiliziya mba nshaka kuvuga abakirisitu, kuko kiliziya ni ntagatifu, nticumura, ariko twebwe turi abanyabyaha.”

CNN yatangaje ko Papa Francis yavuze ko kiliziya igomba gusaba imbabazi bitewe n’amakosa yagiye akorwa mu izina ryayo uko imyaka itashye.

Ati “Ndizera ko Atari kiliziya yonyine izasaba imbabazi ku batinganyi yakoshereje ahubwo no ku bakene, abana n’abagore bagiye bakoreshwa ibidakwiye, abana bakoreshejwe imirimo ivunanye.”

Padiri James Martin wo mu Muryango w’Abayozuwiti akaba n’umwanditsi mukuru w’ikinyamakuru cyitwa America Magazine, yari yarasabye Papa gusaba imbabazi abatiganyi b’ibitsina byombi.

Ati “ Mu gihe Papa Jean Paul II yasabaga imbabazi ibyiciro bitandukanye by’abantu mu 2000, ntabwo yasabye imbabazi abatinganyi. Ibyo papa yakoze ni ukuri, icya mbere ni uko kubabarira ari inzira y’ubuzima bwa gikirisitu. Icya kabiri bifasha ko nta gice cy’abantu kiyumva nkicyahawe akato na kiliziya uyu munsi.”

Icyo gisubizo cya Papa kirasubiza ubusabe bwa Karidinali w’Umudage uherutse gusaba ko Kiliziya isaba imbabazi ko yirengagije ikibazo cy’abatinganyi.

Papa kandi yagarutse ku bwicanyi buherutse gukorerwa abatinganyi bari mu nzu y’ibirori mu Mujyi wa Orlando muri Leta Zunze Ubumwe za Amerika ahishwe abagera kuri 49, tariki ya 12 Kamena 2016, avuga ko nta we ukwiye kwishimira ko hari uwishwe nk’uko byagaragaye kuri bamwe, yemeza ko bidakwiye.

Kiliziya Gatolika ntishyigikiye ubutinganyi , yemera ko umugabo agomba gusezerana n’umugore umwe bakabana akaramata.



Tanga igitekerezo kuri iyi nkuru



Igitekerezo