Umurwanyi wa FDLR arayigira  inama

Kapiteni Hitimana Mwesa umwe mu barwanyi ba FDLR 13 barikumwe n’abagize imiryango yabo bagera kuri 39 batahutse mu Rwanda ku wa Kabiri tariki 4 Ukwakira 2017 asanga igihe kigeze ko uyu mutwe uhagariki ibikorwa byo guhungabanya umutekano ugaha amahoro Repubulika Iharanira Demokarasi ya Congo.

Nk’uko bitangazwa n’Ingabo z’Umuryango w’Abibumbye ziri mu butumwa bw’Amahoro muri Repubulika Iharanira Demokarasi ya Congo (MONUSCO) ngo Kapiteni yazanye n’abagenzi be barimo ufite ipeti rya Majoro n’undi ufite ipeti rya Sergent ngo bose bakaba baravuye muri Teritwari ya Masisi mu gace ka Kichanga na Kibabi mu Ntara ya Kivu y’Amajyaruguru.

Kapiteni Jean Bosco Hitimana Mwesa akaba yasobanuye ko batashye mu Rwanda ku bushake ko nta muntu wigeze abashyiraho igitutu ngo bakaba barabikoze nyuma yo kumenya ko mu Rwanda ari amahoro.

Kapiteni Hitimana akaba akangurira abasigaye mu mashyamba ya Congo kuza mu gihugu cy’Ababyaye kuko abatashye bamaze kugera kuri byinshi ati’’Abari mu mashyamba barababarira ubusa kuko bababeshya ko nibaza mu Rwanda bazicwa ,ni ikinyoma’’

Akomeza avuga ko abagiye bataha ubu bamaze gufatisha ubuzima ,bagiye bahabwa inka ndetse bagahabwa n’inguzanyo mu mabanki aho babayeho neza bityo akaba yumva aricyo gihe ngo FDLR ihe Congo amahoro nk’uko bitangazwa na Radio Okapi.

Uburyo aba barwanyi batashye burihariye kuko ngo ni ubwa mbere abantu bagera kuri 50 batahiye rimwe bavuye mu mutwe umwe (FDLR) n’agace kamwe ka Masisi. Mbere yo gutaha, abo bose babanje kunyura ku rwego rushinze abinjira n’abasohoka mu Mujyi wa Goma kugira ngo basuzume ibyangombwa byabo.

FDLR irwanya Leta y’u Rwanda ikaba igizwe ahanini n’abagize uruhare muri Jenoside yakorewe Abatutsi mu Rwanda mu 1994 ,ukaba waranashyizwe k’urutonde rw’imitwe y’iterabwoba na Leta Zunze Ubumwe za Amerika.

FDLR ikaba ikunze gushyirwa mu majwi n’imiryango mpuzamahanga ndetse n’abaturage ba Repubulika Iharanira Demokarasi ya Congo bayishinjwa kwica,Iyica rubozo ,gusahura, gufata ku ngufu abagore n’abakobwa ndetse no gukoresha abana mu ntambara.

Sibyo gusa uyu mutwe ngo ukaba ufata bugwate abanyarwanda bashaka gutaha mu Rwanda nk’uko yishimangirwa n’abaza bawucitse bemeza ko ngo iyo bimenyekanye ko umuntu ashaka kuza mutwa yicwa.

Gabriel Habineza/Umubavu.com



Tanga igitekerezo kuri iyi nkuru



Igitekerezo