Rusizi : Imvura idasanzwe yahitanye umwana n’umukecuru

Imvura ivanze n’umuyaga yahitanye umwana w’umwaka umwe n’amezi umunani, wo mu Murenge wa Bugarama n’umukecuru uri mu kigero cy’imyaka 75 wo mu Murenge wa Muganza, mu Karere ka Rusizi.

Umwana witwa Niyokwizerwa Chance ni we witabye Imana, agwiriwe n’igikuta cy’inzu mu gihe umukecuru yatwawe n’amazi yamurushije imbaraga ubwo yari avuye guhinga kuri uyu wa 9 Ukwakira 2017.

Umunyamabanga Nshingwabikorwa w’Umurenge wa Bugarama, Ntivuguruzwa Gervais asobanura iby’abashegeshwe n’iyi mvura yagize ati “Ni imvura yaguye ari nyinshi irimo n’umuyaga saa saba n’igice ; umwana w’umwaka umwe n’amezi umunani yagwiriwe n’igikuta cy’inzu abandi babiri bakomeretse bajyanwa ku Kigo Nderabuzima cya Islamic Bugarama.”

Mu Murenge wa Muganza habarurwa nibura inzu zigera kuri 50 zasenywe n’iyi mvura yasize abaturage badafite aho kurambika umusaya n’ibikoresho bitaramenyekana agaciro kabyo byangiritse.

Ubuyobozi bw’umurenge wa Bugarama buvuga ko imidugudu ya Gombaniro na Mubombo ariyo yibasiwe cyane.

Mu kwezi gushize kwa Nzeri imvura yasenye inzu z’abaturage, ibigo by’amashuri, insengero, ibihingwa n’uruganda rutari rutarangira gukora mu mirenge itandukanye y’Akarere ka Rusizi.

Zimwe mu nzu MIDIMAR yari yubakiye abahuye n’ibi biza ziri mu zasenyutse nyuma y’aho imvura y’uyu munsi ishegeshe inkuta zayo n’umuyaga ugatwara ibisenge.



Tanga igitekerezo kuri iyi nkuru



Igitekerezo