Perezida Kagame yihanangirije  abayobozi baha  abaturage  serivisi  mbi

Perezida Paul Kagame yongeye kunenga abayobozi cyane cyane abo ku rwego rw’Uturere bagikomeje guha serivise mbi abaturage, abibutsa ko abo adateze kuzabihanganira.

Umukuru w’Igihugu avuga ko bitumvikana uburyo umuturage atanga amafaranga y’ubwisungane mu kwivuza, ariko kugira ngo azahabwe serivise bikananirana, avuga ko abo bayobozi atazabihanganira.

Ibi Perezida Kagame yabivugiye mu Nteko Ishinga Amategeko y’u Rwanda, ubwo hatangagazwaga uburyo uturere ndetse n’izindi nzego za Leta zesheje imihigo ya 2016-2017, no gusinya Imihigo n’ Abayobozi b’Uturere na za Minisiteri umwaka wa 2017-2018.

Perezida Paul Kagame yashimiye abakoze neza, abari inyuma nabo avuga ko uko biri kose hari icyo baba bakoze nk’uko amanota abibona.

Perezida Kagame yavuze ko imihigo ari igikorwa gikwiye kuba kigaragaza uko u Rwanda rugenda rutera imbere.

Yavuze ko atagaye ikigo cyakoreshejwe gukora iri suzuma, ariko asaba ko hakongerwamo nk’ikigo cyangwa urwego rugendana n’iby’ibarurishamibare, kugira ngo bajye batanga n’imibare ishingiye ku bintu bifatika kurushaho.

Ibi ngo byatanga neza ibimenyetso mu mibare igaragaza aho igihugu kiri, imbaraga n’amikoro byatanzwe icyabivuyemo, niba abantu basubira inyuma cyangwa batera imbere.

Perezida Kagame yanenze imikoranire hagati y’inzego itaranoga, avuga ko ntaho abantu bagera badakorana neza.

Yavuze kandi ko abitwara nabi mu mihigo ingaruka atari bo zigeraho (abayobozi, ba Minisitiri…) ahubwo zigera ku baturage bayobora. Bagahura n’ingaruka mbi z’imikorere mibi y’abayobozi.

Asoza ijambo rye Perezida Kagame yasabye abayobozi b’Uturere gutanga servisi ku baturage kuko ari inshingano bafite.

Ati“ntabwo inshingano mufite n’imyanya mufitiye bibaha uburenganzira bwo guhitamo niba uri butange servisi, niba utayitanga…oya ni inshingano, ni ngombwa.

Umukuru w’Igihugu yakomeje avuga ko abaturage baba barishyuye mutuelle de sante ngo babe aho umubare munini uhora uganya ko utabona servisi, kandi nta cyabuze. Ahubwo ari processing…abantu bakirirwa batonze umurongo… ugomba kubikora akaza igihe ashakiye cyangwa ntaze…. yaza nabwo akaza areba kw’isaha yihuta ashaka gutaha.

Ati’’Agaha servisi abantu 30% bari bamutegereje abandi 70% bagataha bagategereza igihe azaba ameze neza yazindutse. Ibyo ni igice kimwe ariko hari n’ibindi.’’

Yakomeje ati “Ndabasaba rero….nkoresheje gusaba…ariko mwumve n’ikibiri inyuma mukibwire…. kuko hari ubwo umuntu asaba umuntu ikintu akwiriye kuba akora ntagikore, ariko hari ubwo bizagera aho nisaba.. ubu rero ndabibasaba ngo nimuhe serivisi abaturage.”

Nyuma yo gutangaza uburyo uturere twarushanyijwe mu kwesa imihigo, Abayobozi b’uturere ndetse na za Minisiteri bahise basinyana na Perezida wa Repubulika Paul Kagame imihigo y’umwaka wa 2017-2018.

Iyi mihigo ngo ifite umwihariko, ugereranije n’isanzwe isinywa, ngo kuko yagenwe bagendeye ku byifuzo by’abaturage, byakusanyijwe guhera ku rwego rw’Umudugudu nk’uko Minisitiri w’Intebe Dr. Ngirente Edouard yabitangaje.

Uko uturere twakurikiranye mu kwesa IMIHIGO 2016/2017

1. Rwamagana 82.2%

2. Musanze, 81.28 %

3. Huye 80.55 %

4. Gakenke 80.12 %

5. Nyarugenge 79.71 %

6. Gatsibo 79.55%

7. Kirehe 79.39%

8. Burera 79.33%

9. Gasabo, 79.19 %

10. Gicumbi 79.19%

11.Nyasheke 78.74%

12. Rutsirto 78.74%

13. Karongi 78.62%

14. Rusizi 78.60 %

15. Nyaruguru 78.40%

16. Muhanga 78.40 %

17. Ngororero 78.33%

18. Nyagatare 78.85%

19. Kamonyi 77.51%

20. Ngoma, 77.50%

21. Nyanza 77.15%

22. Bugesera 76.95%

23 Kayonza 76.86%

24. Nyabihu 76.15%

25. Kicukiro 76.2 %

26. Gisagara 75.66%

27. Nyamagabe 75.55%

28. Ruhango 75.27 %

29. Rulindo 75.19 %

30. Rubavu 72.86



Tanga igitekerezo kuri iyi nkuru



Igitekerezo