Kenya : Ku myaka 80 y’amavuko ashoje amasomo ya Kaminuza kandi agikomeza no kwiga

Janet David Silla, umukecuru w’imyaka 80 y’amavuko yose wo mu gihugu cya Kenya yakoze ku mitima ya benshi nyuma yo gukomeza ishuri akuze bene aka kageni kuri ubu akaba ashoje amasomo y’icyiciri cya mbere cya Kaminuza muri Kaminuza ya St Paul’s University ndetse akaba avuga ko afite gahunda yo kuruhuka abonye impamyabumenyi y’icyiciri cya 2 cya Kaminuza.

Janet David Silla yatangaje ko icyamuteye kutavirira ishuri nubwo yarikomeje ashaje ari uko mu bihe bya kera atari yaragize amahirwe yo kwiga bitewe n’ubukene bw’umuryango we ndetse n’imyumvire yabo yak era.

Ku munsi wa gatanu tariki ya 06 Ukwakira nibwo Kaminuza ya St Paul’s University yakoze ibirori by’abarangiza amasomo ya Kaminuza bizwi nka Graduation aho iyi Kaminuza yasohotsemo abanyeshuri basaga 2,969 Janet David Silla nawe arimo akaba yarahawe impamyabumenyi ye mu ishami ry’amajyambere.

Gusa avuga ko ku bijyanye n’imitsindire ye y’amaso yagiye ahura n’imbogamizi zikomeye zirimo abamucaga integer bamubwira ko ntabyo azashobora bitewe n’imyaka ye ndetse n’abanyeshuri bagenzi be bamusekaga cyane aho kugira icyo bamufasha mu myigire ye.

Yagize ati “abanyeshuri bagenzi bange ntibigeze banyizera nk’umunyeshuri mugenzi wabo. Bumvaga ko nakagombye kuba ndi mwalimu wabo aho kwigana nabo bityo bakambaza icyatumye nza kwiga ku myaka mfite aho kuba nakabaye mbigisha ndetse batibagiwe no kumbaza umuntu wanzanye uwo ari we. Umwe mu barimu bange nawe witwa Silla nawe aratangara niko kumbwira ngo kwiga sinabishobora nyamara gewe numvaga nta kibazo mfite. Izi zose ni imbogamizi nagiye mpura nazo ariko ntibyanciye integer kuri ubu nshoje amasomo yange neza nta kibazo mfite”.

Abana be ndetse n’abuzukuru ngo nabo mu mwaka wa 2009 bamubujije gukomeza amasomo ye kuko babonaga ashaje bamuseka cyane ko ntabyo yashobora ariko nawe ababera ibamba niko gukomeza ishuri.

Janet David Silla yafashe umwanzuro wo gukomeza amasomo mu mwaka wa 2008 nyuma yo gusura inshuti ze zo mu gihugu cya Uganda ziga muri Kaminuza ya Bungoma nazo zishesha akanguhe ariko nazo zitaravirira ishuri. Nyuma uyu mukecuru yahise afata icyemezo akomeza amasomo ye atangira Kaminuza nubwo hagiye hazamo imbogamizi zanagiye zituma asubika amasomo ye.
Janet David Silla yasoje avuga ko nubwo bimeze gutyo agikomeje kwiga kugeza abonye impamyabumenyi y’icyiciri cya kabiri cya Kaminuza atitaye ku menyo y’abamuseka bose.

Ubuyobozi bwa Kaminuza ya St Paul’s University bwashimye cyane uyu mukecuru ku mpamyabumenyi abonye bunamwifuriza ishya n’ihirwe mu buzima bwe ndetse no gukomeza kwereka abagore ko bashoboye ndetse n’abana b’abakobwa dore ko bamwe babuzwa amahirwe yabo yo kwiga hagendewe ku gitsina cyabo nkuko kera byagendaga.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo