Intambara y’amagambo hagati ya Museveni na Bobi Wine

Perezida wa Uganda, Yoweri Kaguta Museveni, yasubije Depite Robert Kyagulanyi uzwi cyane ku izina rya ‘Bobi Wine’ ukomeje kumunenga ko we n’abadepite b’ishyaka rya NRM bafite umugambi wo guhindura itegeko nshinga, akazakomeza kuyobora.

Bobi Wine yakomeje kwitambika ibiganiro mu Nteko Ishinga Amategeko ku myaka Umukuru w’igihugu agomba kuba afite ndetse mu minsi ishize we n’abadepite bavuga rumwe basohowe mu nteko ku ngufu bamaze kurwana.

Mu ibaruwa yasohoye ku wa Gatanu, Museveni yavuze ko Bobi Wine atazi ibigwi by’ishyaka riri ku butegetsi rya NRM cyangwa akaba abizi ahubwo akabyirengagiza agahitamo kubeshya abaturage, abagumura.

Nk’uko Daily Monitor yabyanditse, Museveni yatangiye yemeza ko Uganda yabonye amahoro asesuye ku buyobozi bwe gusa mu myaka 500 ishize.

Yagize ati “ Mu by’ukuri mu myaka 31 maze ku buyobozi, muri 2007 ubwo twari tumaze gutsinda burundu umutwe wa ADF nibwo Uganda yagize amahoro bwa mbere mu myaka 500.

Yunzemo ati “Hon. Bobi Wine, ushobora kuba nta makuru ufite cyangwa uri umubeshyi, ni gute uvuga ko mbere y’uko nyobora igihugu cyari gifite ikuzo kandi abaturage nta sukari bagiraga, nta munyu, nta peteroli , nta mutekano nta buzima cyangwa umutungo ?

Perezida Museveni yemera ko muri Uganda hagaragaye ubwicanyi ngo ni buke ugereranyije n’intambara n’iterabwoba bigaragara mu bindi bihugu.

Museveni yagiye asubiza ingingo ku yindi ibibazo Bobi Wine avuga ko byugarije Uganda, birimo ubushomeri, umwenda igihugu kibereyemo amahanga n’ubwicanyi bumaze iminsi.

Yibukije ko mbere yo kuba umudepite, Bobi Wine nawe yari yarashoboye kwikiza ubushomeri, kuko yari umuririmbyi ariko aho atakanguriye urubyiruko kwikura mu bukene akaba ashaka gutema igiti yicariye.

Kuva Bobi Wine yatorerwa kuba Depite yazamuye ijwi yibasira ubutegetsi bwa Perezida Yoweri Museveni, abushinja ibibazo birimo ubushomeri, ruswa, ubukene bukabije n’ibindi.

Muri iyi minsi avuga ko abambari ba Museveni bamumereye nabi kuko bateye iwe mu rugo za gerenade zitagize uwo zihitana ku ya 3 Ukwakira 2017 ndetse n’ubu bakaba bakomeje kumwoherereza ubutumwa bumubwira ko azicwa nakomeza kwitambika ibiganiro ku myaka Perezida wa Uganda agomba kuba atarengeje.



Tanga igitekerezo kuri iyi nkuru



Igitekerezo