Human Rights Watch yatunze  urutoki igisirikare cy’u  Rwanda

Umuryango uharanira uburenganzira bwa muntu, Human Rights Watch , kuri uyu wa Kabiri tariki 10 Ukwakira ,2017 washyize ahagaragara icyegeranyo kigizwe na Page 91 kivuga ko abatavuga rumwe na Leta y’u Rwanda barenga ijana bakorewe iyica rubozo aho bari bafungiye mu bigo bya gisirikare hagati ya 2010 na 2016.

Uyu muryango muri iki cyegeranyo uvuga ko benshi mu bakorewe iyica rubozo ari abakekwa ho kuba ari abo mu ishyaka rya RNC ndetse n’umutwe wa FDLR.

Ngo abakorewe iyica rubozo babwiye abakoze iki cyegeranyo ko abasirikare mu kubabaza bakoreshaga umuriro w’amashanyarari ndetse bakabareka ibintu bibereka ko bagiye gupfa cyangwa kubikoreza ibintu biremereye .

Bakomeza bavuga ko abasirikare babambikaga amapingu ku maboko no ku maguru mu gihe cy’amezi menshi aho bayakuragamo ari uko bagiye kwituma gusa.Iki cyegeranyo kikaba kivuga ko ibi byose byakorwaga kugira ngo abafunzwe bemere ibyo bashinjwa bita ibihimbano.

Human Right Watch kandi muri iki cyegeranyo irashinja abacamanza n’abashinjacyaha kudaha agaciro ibyo abafunzwe bavuga.

Mu mwaka ushize ,uwari Minisitiri w’Umutekano mu Rwanda yahakanye yivuye inyuma ko nta bantu bakorerwa iyica rubozo igihe barimo kubazwa ndetse yanashimangiye ko nta muntu n’umwe ufungiye mu bigo bya gisirikare nk’uko bitangazwa na BBC.

Si inshuro ya mbere HRW isohora ibyegeranyo bitandukanye ku Rwanda ariko iteka ugasanga bitavugwaho rumwe n’impande zombi, aho Guverinoma y’u Rwanda ishinja uyu muryango gukomeza kwica nkana amasezerano wagiranye n’u Rwanda hagamijwe kunoza ubunyamwuga mu byegeranyo byinshi irukoraho umwaka ku wundi.

Ubwo Minisitiri w’Ubutabera, Busingye Johnston yabonanaga na Lewis Mudge, wari uhagarariye HRW muri Afurika, muri Mata 2014, yamugaragarije ko uyu muryango ukomeje kwica nkana amasezerano wagiranye n’u Rwanda bishobora gutuma ruyasesa.

Icyo gihe Busingye yagize ati “Dufitanye amasezerano, ubushakashatsi badukozeho nibatubwire, niba bavuze ko turi paradizo tubabwire tuti ‘mwakoze cyane, cyangwa tuvuge tuti aha ariko siko tubibona’[…] Si byiza ko bandika gusa, natwe dufite uburenganzira bwo kuyavugaho, ni inshingano zacu gusobanurira Abanyarwanda n’Isi ibyatuvuzweho.”

Umubavu.com



Tanga igitekerezo kuri iyi nkuru



Igitekerezo