Hatangiye iperereza ku duhanga tw’Abanyarwanda n’abandi Banyafurika  turi mu Budage

Leta y’u Budage yatangaje ko yatangiye gukora iperereza ry’uduhanga tw’abantu ifite dusaga igihumbi, twakuwe mu Rwanda no mu bindi bihugu bya Afurika.

Twinshi muri utwo duhanga Leta y’u Budage ifite, ivuga ko ari utw’Abanyarwanda, imaranye imyaka isaga 100 nk’uko BBC dukesha iyi nkuru ibitangaza.

Bitangazwa ko u Budage bwagiye butwara utwo duhanga n’amagufa, bigiye gukorerwaho ubushakashatsi bushingiye ku moko, tukaba tumaze kumara imyaka myinshi mu bubiko ngo ku buryo twatangiye kwangirika.

Batangaza kandi ko utwo duhanga kubera igihe kirekire tumaze, twangiritse, ariko ubu twose tukaba twarashyizwe hamwe ngo dukorerweho iperereza ariko tumwe ngo impapuro zituranga zarashaje zirabura.

Abashakashatsi bavuga ko ibimenyetso byiza bihari ari inyandiko ziri ku magufa yatwo gusa, ko ibindi byashaje.

Mu mpera z’umwaka ushize nibwo Radio ARD yo mu Budage yatangaje ko yabonye urutonde rw’ibisigazwa by’abantu bikibitswe na ‘Prussian Cultural Heritage Foundation’, ishinzwe gucunga inzu ndangamurage zo mu murwa mukuru w’u Budage.

Twinshi muri utu duhanga n’amagufa ngo biriho ibirango bigaragaza ko byaturutse mu bihugu Abadage bahoze bakoloniza muri Afurika y’Iburasirazuba, harimo 1,003 byavuye mu Rwanda na 60 byavuye muri Tanzania. Muri ibi hakaba harimo uduhanga 10 tw’abana.

Yatangaje ko bishoboka ko byaba ari iby’abantu barwanyaga ubukoloni baciwe imitwe n’abasirikare b’Abadage uduhanga twabo tukoherezwa i Berlin gukorerwaho ubushakashatsi.

Ubwo ARD yabazaga Hermann Parzinger, umuyobozi w’iyi foundation, yasubije ko nta kibazo bafite cyo gusubiza ibi bintu aho byaturutse. U Budage bukaba muri iyi myaka bumaze gusubiza uduhanga 20 tw’abanyanamibiya twari twatwawe gutyo.



Tanga igitekerezo kuri iyi nkuru



Igitekerezo