Espagne : Iby’ubwigenge bw’intara ya Catalogne bikomeje kuba agatereranzamba

Umuyobozi w’intara ya Catalogn, Carles Puigdemont kuri ubu asumbirijwe n’ibihumbi by’abantu bamwe na bamwe bamusaba guheba ibyo kwigenga kw’intara ayoboye ya Catalogne mu gihe byitezwe ko ageza ijambo rye ku Nteko Nshingamatageko y’aka karere binakekwa ko ashobora kuvuga ko iyi ntara yigenga agendeye ku matora yabaye nubwo abaturage bose batayitabiriye uko byari biteganyijwe.

Biri kuvugwa ko Carles Puigdemont mu ijambo rye ashobora kuvuga ko iyo ntara yigenga agendeye ku matora ya kamarampaka yabaye tariki ya 01 Ukwakira 2017 nubwo yabaye nk’ayaburijwemo ntabe uko byari biteganyijwe ndetse abaturage bose ntibayitabire bamwe babishyigikiye abandi batabivugaho rumwe.
Abapolisi bitwaje imbunda bakwiragiye ahantu hose hegereye Inteko Inshingamategeko cyane ko ari naho biteganyijwe ko Bwana Carles Puigdemont aza kuvugira ijambo rye.

Umuyobozi w’umugi wa Barcelone yamaganiye kure Puigdemont na Minisitiri w’Intebe wa Espagne, Mariano Rajoy avuga ko bakwiye kwiga ukuntu iki kibazo cyakemuka mu mahoro bumvikanye.

Kuva mu gitondo cya kare kuri uyu munsi wa kabiri igipolisi cya Catalogne kizwi nka Mossos d’Esquadra cyari cyamaze kuzura mu gace ka Ciutadella mu mugi wa Barcelone gifite n’imodoka zacyo nyinshi zikoreshwa mu kurinda umutekano. Aka gace gaherereyemo Inteko Nshingamategeko kari kagoswe bikomeye yewe no mu nkengero zako hose hari harinzwe.

Abayobozi b’iyi ntara bavuga ko hatekerejwe uburyo bwose bwo gucunga umutekano bivuye ku myigaragambyo yabaye ku munsi w’amatora yamagana umugambi wa Catalogne wo kwiyomora kuri Espagne.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo