Bishop Sibomana na Tom Rwagasana bambuwe inshingano zose muri ADEPR

Itorero rya ADEPR ryambuye Ubupasiteri Bishop Sibomana Jean wahoze ari Umuvugizi waryo na Bishop Tom Rwagasana wari umwungirije, bose baheruka gufungurwa by’agateganyo n’Urukiko Rukuru.

Mu kwezi gushize aba bombi bafunguwe by’agateganyo kubera impamvu z’uburwayi, bakurikiranyweho n’ubutabera kunyereza miliyari zisaga ebyiri z’amafaranga y’u Rwanda ubwo hagati ya 2015 na 2016 bayoboraga iri torero.

Nyuma yo gusubira hanze, itorero ryabo ryabandikiye amabaruwa abambura inshingano. Buri wese yandikiwe ati“ Dushingiye ku myitwarire mibi yakugaragayeho mu micungire y’umutungo w’Itorero no kutaba inyangamugayo muri ibyo nk’uko bigaragazwa muri raporo mu igenzura ku mikoreshereze y’umutungo w’Itorero rya ADEPR”

Dushingiye kandi ku mwanzuro w’Inama ya Biro Nyobozi ya ADEPR yateranye kuwa 5 Ukwakira 2017. Tubabajwe no kukumenyesha ko wambuwe inshingano za Gipasitori muri ADEPR uhereye kuri iyi tariki ya 6 Ukwakira 2017.”

Inkubiri y’ifungwa ry’abahoze bayoboye ADEPR yaje muri Gicurasi uyu mwaka ndetse nyuma yo kugera muri gereza bahise basimburwa n’indi komite.

Abafunzwe barimo Sibomana wari Umuvugizi wa ADEPR, uwari umwungirije, Tom Rwagasana ; uwari ushinzwe ubuzima bw’itorero ; Mutuyemariya Christine ; uwari ushinzwe ubutegetsi n’imari, Sebagabo Bernard n’abandi.

Amakuru aturuka muri ADEPR ni uko aba bambuwe ubupasiteri bashobora no gucibwa mu gihe mu nsengero basengeramo zazabyigaho zikabifataho icyemezo. Aho basengera kandi ni naho bashobora kugana bagasaba imbabazi. Kugeza ubwo twatangazaga iyi nkuru, Umuvugizi wa ADEPR , Rev. Karuranga Ephraim, ntitwabashije kuvugana nawe kuri telefone ngo agire icyo abivugaho.



Tanga igitekerezo kuri iyi nkuru



Igitekerezo