Abo kwa Rwigara basabye amafaranga yabo yafatiriwe na Polisi banahakana ibyaha baregwa

Ubwo boingeraga kugezwa imbere y’Urukiko rwisumbuye rwa Nyarugenge ngo baburanishwe ku byaha bakurikiranyweho ku bijyanye n’infunga n’ifungura ry’agateganyo kuri uyu wa Gatatu tariki 11 Ukwakira 2017, Diane Rwigara, nyina Adeline Rwigara na murumuna we Anne Rwigara basabye ko bahabwa amafaranga ku yo Polisi yafatiriye igihe hakorwaga isakwa mu rugo rwabo mu bikorwa by’iperereza maze Adeline Rwigara akabona uburyo ashaka undi mwuganizi kuko uwo bafite adahagije bakurikije ubunini bwa dosiye yabo.

Adeline Rwigara akaba yasabye ko urubanza rwasubikwa we agashaka undi umwunganira mu mategeko, hanyuma Me Pierre Celestin Buhuru akaburanira abakobwa be, kuko ngo dosiye ari nini cyane itahabwa umunyamategeko umwe.

Iburanisha rikimara gutangira, Adeline Rwigara yasabye ko yakunganirwa mu mategeko na Me Gatera Gashabana, agaragaza inzitizi y’uko adashobora kuburana adafite umwunganira kandi ngo ubunini bwa dosiye butatuma Me Pierre Celestin Buhuru abasha kubunganira uko ari batatu.

Diane, murumuna we Anne na nyina Adeline bahuriye ku cyaha bashinjwa cyo guteza imvururu muri rubanda.

Nyina Adeline Rwigara we hakiyongeraho icyaha ashinjwa cyo kubiba amacakubiri muri rubanda.

Abaregwa bose bavuze ko batemera ibi byaha baregwa.

Adeline Rwigara nyina w’aba bakobwa ati “Murakoze Perezidante mamwe bacamanza, mu cyubahiro cy’Imana ndabashimiye….ibyaha ndegwa ntabwo mbyemera.”

Adeline Rwigara yavuze ko yumva yahabwa uburenganzira bwe akunganirwa n’undi munyamategeko yahisemo witwa Me Gatera Gashabana, kandi asaba ko yahabwa amafaranga yo kwishyura uwo munyamategeko, kuko ngo ayo bari bafite Polisi yayafatiriye ubwo hakorwaga isakwa mu rugo rwabo mu rwego rw’iperereza ku byaha bakurikiranyweho.

Anne Rwigara at “ibyaha ndegwa n’ubu biracyantungura ,ntabwo mbyemera.

Diane Rwigara nawe ati “nanjye ntabwo mbyemera.”
Diane Rwigara kandi yavuze ko atigeze ahabwa umwanya wo kuvugana n’umwunganira ndetse ko yasabye kumuhabwa kera bikananirana, bitewe ahanini n’uko ngo nta mafaranga bari bafite yo kumushaka kubera ko amafaranga bafatiriwe na Polisi batari bahaweho ayo bari bakeneye.

Avuga ko yasabye umwunganizi tariki 28 Kanama hakaba hashize iminsi micye amubonye, ngo na dosiye akaba ayiboneye hano mu rukiko .

Yavuze ko agifatwa yasabye ko bamusubiza amafranga macye agashaka ubunganizi batatu ariko ntayahabwe. Mu gihe ngo amaze icyumweru kimwe abonye umwunganizi, Ubushinjacyaha bwo ngo bumaze ukwezi bwiga dossier ye.

Me Pierre Celestin Buhuru nawe yavuze ko yiteguye kuburanira Anne Rwigara na Diane Rwigara, ndetse akomeza kugaragaza ko ubunini bwa dosiye bwatumye n’ubu hari ibyo yifuza muri dosiye atarahabwa.

Urukiko nyuma yo kwiherera rwafashe umwanzuro w’uko ku bijyanye n’inzitizi zatanzwe na Adeline Rwigara, Itegeko Nshinga ry’u Rwanda rimwemerera uburenganzira bwo kubona umwunganira no kwihitiramo umwunganira mu mategeko, bityo akaba agomba kwemererwa ibyo asaba.

Ku bijyanye n’uko Adeline Rwigara asaba urukiko ko rwategeka Polisi guhabwa amafaranga ko yo bafatiriye, Urukiko rwasanze igihe kitaragera ko ibyafatiriwe bisubizwa. Rwahise rusubika urubanza maze rwimurirwa kuwa Gatanu tariki 13 Ukwakira 2017, kandi ngo yindi mpamvu n’imwe izatuma ruzongera gusubikwa.

Gabriel Habineza/umubavu.com



Tanga igitekerezo kuri iyi nkuru



Igitekerezo