Yatorewe kuba umudepite atagira n’imyenda yo kwambara

John Paul Mirigwi w’imyaka 24 y’amavuko gusa nyuma yuko atorewe kuba intumwa ya rubanda mu gihugu cya Kenya, umucuruzi w’imyenda usanzwe yambika Perezida Uhuru Kenyatta yamuhaye impano y’imyenda mishya kuko yari asanzwe ari umukene.

Umunyarwanda yaravuze ngo ukinisha kurya ugahagiramo undi nawe ati “nta bitugu bitaberwa n’ikoti”, uyu ni umwana w’imyaka 24 gusa y’amavuko ukomoka mu gihugu cya mu muryango uciriritse wiyamamarije kuba umudepite atiha amahirwe na make kuko yari ahanganye n’abatunze agatubutse we ntacyo atunze ariko burya ngo buri wese agira igihe cye Imana iba yaramugeneye.

John Paul Mirigwi nubwo nta mitungo myinshi yari yibitseho ngo dore ko no kwiyamamaza hamwe yagendaga n’amaguru abandi bagenda mu mamodoka yabo, ibi ntibyatumye atabakubita inshuro akegukana umwanya wo kwicara mu nteto inshinga amategeko ya Kenya.

Gusa nyuma yuko atsindiye kuba umudepite nibwo uyu mucuruzi w’imyenda yahaye John Paul Mirigwi imyenda mishya irimo ikotin’ipantaro yaryo, ikaruvati ndetse n’inkweto. Bivugwa ko uyu mucuruzi ari inshuti y’akadasohoka ya Perezida Uhuru Kenyatta bikanavugwa ko iyi myenda yahawe yaba yarayigenewe na Kenyatta.
Mu gihe cyo kurahira ngo uyu mudepite nibwo yagaragaye rwose ngo yambaye imyenda isanzwe ngo doreko yanambaraga ishati itagira isengeri yewe n’inkweto zidahenze ari nabyo byatumye uyu mucuruzi amugenera iyi myenda ngo nawe agaragare neza.

Uyu mucuruzi, Caroline Pulei ngo ufite iduka ry’imyenda ryitwa “Naneuleshan mu gihugu cya Kenya” ngo yamuhaye iyi myenda kugira ngo atangire akazi ke ko guhagararira rubanda ameze neza.

Ubwo yajyaga gufata iyi myenda, John Paul Mirigwi yajyanye na bamwe mu badepite bagenzi be barimo John Kiarie ndetse n’uyu mushyushyarugamba umenyerewe ari we MC Jesse.

Byatunguye abantu batandukanye ngo kubona John Paul Mirigwi w’imyaka mikeya nk’iyi ndetse w’umukene atsinda abantu bakuru ndetse banagiye bakoresha ubushobozi buhambaye mu kwiyamamaza kwabo nyamara we ngo nta bihambaye yari afite byo gukoresha kuko nta n’imodoka yari afite bikamusaba kujya akoresha amaguru ajya ku rugo ku rundi ababwira ibyo azabamarira natorwa. Uyu mudepite kandi ngo niwe ufite imyaka mikeya mu badepite bose ba Kenya nkuko tubikesha ikinyamakuru Tuko.co.ke gikorera muri Kenya.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo