Yarwanye n’inzoka y’inkazi karahava imusigira ibikomere

Mu cyumweru gishize, Robert Nababan wo mu gihugu cya Indonesia yarwanye n’inzoka y’inkazi ifite uburebure bwa metero zisaga 7 zose ku bw’amahirwe arayinesha ndetse aranayica ariko imusigira ibikomere bikaze ndetse n’umunaniro udasanzwe byanatumye ajya kwa muganga kwivuza.

Robert Nababan wo mu gihugu cya Indonesia yagize amahirwe atabonwa na buri wese nyuma yo kurwana n’inzoka y’inkazi ifite metero 7 akayinesha ndetse akanayica ikamusiga ari muzima nubwo yasigaranye ibikomere ndetse n’umunaniro mwinshi byatumye ajya kwivuza.
Robert Nababan w’imyaka 37 y’amavuko yavuze ko yahuye n’iyi nzoko mu nzira arimo ajya mu rugo iwe mu gace ka Indragiri Hulu Regency mu ntara ya Riau mu gihugu cya Indonesia aho yari avuye ku kazi. Ngo iyi nzoka yahise ifunga inzira abura aho anyura niko gufata icyemezo cyo kurwana nayo.
Mu kiganiro Robert Nababan yagiranye n’itangazamakuru aho yari ari mu bitaro yagize ati “nageragezaga gutambuka igafunga inzira niko kurwana nayo ikanduma amaboko ariko nkomeza kwihagararaho ku bw’amahirwe ndayica”. Iyi nzoka yasigiye uyu mugabo ibikomere ku kuboko kw’ibumoso nkuko yabitangaje ndetse binamusigira umunaniro byanatumye ahita ajyanwa kwa muganga.
Uyu mugabo nyuma yo kugira amahirwe yo kwica iyi nzoka, abantu bo muri aka gace bayibonye baramutangariye bamwe bamwita intwari cyane. Aba bantu bahise bamanika iyi nzoka ku giti ku buryo n’abana bayikoragaho nta kibazo kuko yari yamaze gupfa.
Amakuru yatangajwe na bamwe mu bantu bakomoka muri aka gace kabereyemo ibi avuga ko hari undi mu gabo wahuye n’indi nzoka akagerageza kuyirwanya kubw’amahirwe makeya bikarangira imumize wese ngo kuko yari nini cyane nyuma akaza kugaragara mu nda y’iyi nzoka yari yananiwe kwikura aho yari iri.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo