Yarakubiswe kugeza apfuye azira ko ari umukristu

Sharoon Masih wo mu gihugu cya Pakistan yarakubiswe n’abanyeshuri bagenzi be bigana kugera apfuye bamuziza ko anywereye ku gikombe cyabo kandi we atari umusilamu nkabo.

Sharoon Masih w’imyaka 17 y’amavuko wo mu gihugu cya Pakistan yakubiswe na bagenzi be bigana kugeza avuyemo umwuka bamuziza ko akoresheje igikombe kimwe nabo kandi we ari umukristu bo bakaba abasilamu.

Sharoon Masih yitabye Imana yari mu mwaka wa kane mu kigo cy’ishuri giherereye mu karere ka Vehari mu gace ka Punjab. Nubwo ibi byabaye nyamara umwarimu wari mu ishuri aba bana bakubita mugenzi wabo yavuze ko ntacyo yabonye ngo kuko yisomeraga ikinyamakuru bityo bikavugwa ko nawe ari umusiramu ari nacyo cyatumye akingira ikibaba aba bana.

Razia Bibi, mama w’uyu mwana yavuze ko ubwo yajyanaga uyu mwana we ku ishuri n’ubundi babanje kumubuza kwicarana nabo. Umwe mu banyeshuri b’abasiramu yaramubwiye ati “uri umukristu niba ushaka kubaho wikwicarana natwe”. Gusa uyu mubyeyi yavuze ko yumvaga ari ibisanzwe by’abana babonanye ubwa mbere ko azamenyerana nabo.

Uyu mubyeyi avuga ko umwana we yamukundaga cyane kuko yakoranaga umurava muri byose. Si mama we gusa ngo kuko n’abarimu bamwe bamukundiraga ko ari umuhanga. Gusa ngo n’ubundi uyu mubyeyi yari azanye uyu mwana we kuri iki kigo n’ubundi amukuye ahandi naho ngo kuko bamuzizaga imyemerere ye.

Kugeza ubu uyu mubyeyi arashinja Polisi yo muri aka gace kutagira icyo ikora ngo aba bana bamwiciye umwana bakurikiranwe. Ihuriro rya gikristu ryo muri Pakistan rikomeje gukusanya inkunga yo gufata mu mugongo umuryango w’uyu mwana kubera ibi byago wagize.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo