Yamukoresheje ibizamini mbere yo kwambikana impeta

Ni umusore wo mu gihugu cya Kenya umenyerewe mu kuvanga umuziki (DJ), DJ Mo wakoresheje ibizamini bitandukanye umuhanzikazi witwa Size 8 mbere yuko bambikana impeta.

DJ Mo yasobanuye uburyo yakoresheje kugira ngo amenye neza imico y’uwo yifuzaga ko barushingana. Uyu mukobwa uzwi mu muziki, Size 8 yakoreshejwe ibizamini bitandukanye birimo gufatira amafunguro mu nzu ziciriritse, gusukura inzu neza kugira ngo bimenyekane niba koko yiteguye neza kuzuza inshingano nshya z’urugo.

Mu kiganiro yagiranye n’ibitangazamakuru bitandukanye byo mu gihugu cya Kenya, DJ MO nibwo yasobanuye uburyo yakoresheje umukunzi we Size 8 ibizamini mbere yuko babana nk’umugabo n’umugore.

DJ MO yasobanuye ko byari ingenzi cyane gubanza gukoresha umukunzi we ibizamini mbere yuko amubera umufasha. Yagize ati “nkitekereza kurongora, nabanje kwimukira mu gace gaciriritse kugira ngo mbone uko ngerageza umukunzi wange”.

DJ MO akigera muri aka gace nibwo yahise asaba umukunzi we Size 8 kumusura cyane ko ngo we yabaga mu nzu ihenze ifite agaciro k’ibihumbi 35,000 by’amashilingi ya Kenya (Ksh) ndetse akagira n’indi mirimo ku ruhande itari ubuhanzi imwinjiriza amafaranga.

DJ MO atitaye ko umukunzi we Size 8 yari afite imodoka ye ndetse n’umushoferi we yamusabye kujya muri icyo cyaro cy’abakene bo hasi cyane kugira ngo arebe ko ubuzima buhindutse hari icyo yakwimarira.

Umunsi umwe DJ MO asiga inzu isa nabi cyane atashye atangazwa no gusanga umukunzi we yayisukuye neza cyane atitaye ko iciriritse.

Nyuma DJ MO yasabye umukunzi we amafaranga ngo nawe agure imodoka nyamara si uko nawe yari ayabuze ahubwo yagiraga ngo amurebe uko yakwifata mu gihe babana we adafite amafaranga gusa yashimishijwe nuko yayamuhaye atamucishije hirya no hino. Yashimishijwe n’ibi agira ati “ abakobwa benshi byagorana ko bakora ibi ariko wowe urabaruta bose”.

Nyuma y’ibi bizamini byose nibwo yafashe umwanzuro wo kurushingana n’umukunzi we Size 8 nyuma yuko ibizamini byose amucishijemo abitsinze kandi neza.

DJ Mo yasoje agira inama abasore bagenzi be ko nabo bajya babanza gusuzuma abo bagiye kurushingana kugira ngo bamenye imiterere yabo mbere bityo bamenye uko bahitamo kugira ngo bazubake ingo zitajegejega.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo