Uwakoze Jenoside yarihiwe amashuri na FARG bimenyekana ageze muri kaminuza

Abagize inteko ishinga amategeko y’u Rwanda basabye ko umuntu warihiwe na FARG kandi yarakoze jenoside akanayihanirwa akurikiranwa akishyuzwa amafaranga yarihiwe atayakwiye kandi agakurikiranwaho icyaha cyo kwiyita uwarokotse Jenoside kandi yarayigizemo uruhare.

Ibi abagize inteko ishinga amategeko babisabye nyuma yo kugezwaho raporo ya Komisiyo y’igihugu yo Kurwanya Jenoside (CNLG) mu mwaka wa 2016/2017.

Muri iyi raporo hagaragaramo umugabo witwa Niyonteze Jean D’amaur CNLG yasanze yararihiwe na FARG abeshya ko yarokotse jenoside kandi nyamara ari mu bantu bayigizemo uruhare.

JPEG - 49.9 ko
Dr Emmanuel Havugimana, Perezida w’inama y’ubutegetsi ya CNLG ni we wagejeje Raporo ku bagize inteko ishinga amategeko.

Depite Mukamurangwa yabajije umuyobozi w’inama y’ubutegetsi ya CNLG icyo CNLG yaba yarakoze kuri ubu buriganya bwakozwe n’uyu mugabo wiyise uwarokotse Jenoside kandi ari mu bayigizemo uruhare.

Depite Mukamurangwa yagize ati :" Hari ikibazo nahuye na cyo muri iyi Raporo aho umugabo witwa Niyonteze Jean D’amaur wigeze gutangirirwa na FARG hanyuma akaza gukurwa k’urutonde akaza gukurikirana uburenganzira bwe ariko nyuma FARG yakurikirana ikibazo cye bagasanga yaranakoze Jenoside yaranayifungiwe imyaka 13, ibi ni agahomamunwa ! Ariko ndagirango nanabaze uretse kubimenya icyo CNLG yakoze kuri iyi dosiye y’aya mafaranga yabanje gutangirirwa.

Yakomeje abaza ati : "...FARG yabikozeho iki ? kuko nibwira ko ari uyu ari n’abandi benshi byagiye bigaragara ko FARG yabishyuriye amafaranga batabikwiye, hari abo ba Se baba barakoze jenoside, iki kibazo kirahari kandi ni benshi cyane. Aha rero ndagirango dushingiye kuri ikingiki babikoreho raporo batubwire icyo bateganya kugirango abantu bose barihiriwe na FARG itaragombaga kubarihira icyo bateganya ku buryo n’amafaranga barihiwe bagomba kuyagarura akagumya agafasha abandi agomba gufasha ! Nabonye ari agahomamunwa ngewe ariko ntabwo nabonye icyo bagikozeho"

Perezida w’inama y’ubutegetsi ya CNLG, Dr Emmanuel Havugimana, asubiza kuri iki kibazo yagize ati : "Ikintu nabivugaho ni uko CNLG ari yo yabimenye iza gusanga uyu muntu aya mafaranga yarayafashe atari abikwiriye, ibimenyesha FARG, FARG na yo ibimenyesha Polisi kugirango akurikiranwe, ahanwe kandi n’ayo mafaranga ayagarure.

Yakomeje avuga ko ububasha bari bafite mu gukurikirana iki kibazo bwose babukoresheje bakaba bategereje ko inzego z’umutekano zizamushyikiriza ubutabera.

Ati : "Ubuvugizi bwacu ni aho bugarukiye kuko twebwe ntabwo dufite ububasha bwo kumufata, ariko twabibwiye inzego bireba kugirango uwo mugabo ashobore kwishyuzwa amafaranga yafashe atari abikwiriye kandi akurikiranwe ku cyaha yakoze gikomeye cyane cyo kujya kwiyita ko yacitse ku icumu kandi ahubwo na we yaramaze abantu.

Mu bindi bibazo byagaragajwe na CNLG ni abantu bakatiwe n’inkiko Gacaca ariko bakaba batarakoze ibihano bakatiwe ahubwo bakaba birirwa bihishahisha mu gihugu no hanze yacyo.

Havugimana yavuze ko abenshi mu bantu bahunze ibihano bagiye bajya mu Ntara y’Iburasirazuba kuko mbere nta bucucike bw’abantu bari bahari ndetse abandi bakaba baraje mu mujyi wa Kigali kuko ari ho bajya bagahisha imyirondoro yabo.

Yasabye inteko mu bushobozi bwayo gufasha CNLG guhangana n’ibi bibazo : Ati : "nagirango nsabe inteko mu bushobozi bwanyu mudufashe."

Hari kandi ikibazo cy’abantu bafungirwa jenoside yakorewe abatutsi ariko barangiza ibihano bakatiwe n’inkiko nubundi bagera hanze ya gereza bagakomeza kurangwa n’ingengabitekerezo ya Jenoside.

Agaruka kuri iyi myitwarire, Havugimana yagize ati : " Hari abantu bahanwa koko bagasaba imbabazi bakarekurwa ariko bagera hanze kamere ikanga. Kamere rero ntikurwa na Reka ! Iranga ikamutamaza ugasanga imyitwarire ye itumye yongera gusubira mu byo yakoraga mbere."



Tanga igitekerezo kuri iyi nkuru



Igitekerezo
komeza simon Kuya 2-11-2017

Ntibyumvikana,kombona akuze kdi akaba yarafunzwe imyaka 13 ubwo ibyo byose yabikoze abanyarwanda batareba ?
Icyo numva nubwo tuvuga ruswa ntizacika n’ubufatanya cyaha.Uriya mugabo ntakuntu atafatanije nabandi rwose.
Ikindi abantu banze gukora ibihano nibenshi cyane kdi uranababona muri Kigali no muburasirazuba ariko muminsi yashize twumvise abadepite bavuga ko bazajyayo dutegereje niba ataramasigara byicaro,nibamwe bimukiyeyo nyuma ya Genocide.