Uwahoze ari Minisitiri yakatiwe gufungwa imyaka 20 muri Cote d’Ivoire

Urukiko rwo mu gihugu cya Cote d’Ivoire rwakatiye Hubert Oulaye wari Ministiri w’imirimo ya Leta ku butegetsi bwa Laurent Gbagbo gufungwa imyaka 20.

Oulaye yakatiwe iki gihano kubera ubufatanyacyaha mu iyicwa ry’abantu umunani mu mwaka wa 2012 barimo abasirikare barindwi b’Umuryango w’Abibumbye babungabunga umutekano. Bwana Oulaye yavuze ko iki ari igihano cya politiki yahawe nta gihamya n’urukiko rw’i Abidjan.

Uhagarariye Cote d’ivoire mu rwego rw’amategeko, Mireille Kouassi, yavuze ko Hubert Oulaye yari yatanze uburyo bw’inkunga y’amafaranga yagombaga gushinga umutwe w’inyeshyamba mu burengerazuba bw’igihugu.

Igihe yasabiraga Bwana Oulaye n’uwo bareganwa, Maurice Djire, gufungwa burundu, yavuze ko rimwe na rimwe umuntu uri inyuma y’igitero ari mubi kuruta ugikora.

Abunganizi mu mategeko ba Bwana Oulaye bavuga ko bazajuririra iki cyemezo.

Igitero cyo muri 2012 cyagabwe mu gihe Cote d’Ivoire yageragezaga kwivana mu mwiryane watewe n’amatora y’umukuru w’igihugu mu 2010, igihe uwari Perezida Laurent Gbagbo yangaga kwemera ko yatsinzwe amatora na Perezida uri ku butegetsi, Alassane Ouattara.

PNG - 503.1 ko
Bwana Oulaye wakatiwe igifungo cy’imyaka 20

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo