Urutonde rw’abemerewe inguzanyo yo kwiga muri Kaminuza y’u Rwanda 2017-2018

Ikigo gishinzwe uburezi mu Rwanda (REB) cyatangaje ko abanyeshuri 7821 aribo bemerewe guhabwa inguzanyo yo kwiga muri Kaminuza y’u Rwanda mu mwaka w’amashuri 2017/18.

Ku rutonde rwatangajwe kuri iki Cyumweru, hagaragaraho abandi banyeshuri 1066 bemerewe inguzanyo ariko bafite ibyangombwa basabwa kubanza gutanga. Mu byangomba bamwe basabwa harimo ikigaragaza icyiciro cy’Ubudehe usaba arimo ndetse n’ibaruwa itangwa na Kaminuza.

Hari abandi banyeshuri 677 basabye kwiga muri Kaminuza y’u Rwanda ariko batigeze bandika basaba kwaka inguzanyo.

Muri Kanama uyu mwaka nibwo Kaminuza y’u Rwanda yatangaje ko abanyeshuri 11027 aribo bemerewe kuyigamo mu banyeshuri basaga ibihumbi 13 bari babisabye.

Ibyagendeweho mu gutanga inguzanyo nkuko bigaragara ku rubuga rwa REB, harimo kuba uyisaba yaragize amanota menshi, kuba ibyo agiye kwiga ari ibijyanye n’ubumenyingiro bimuha andi mahirwe no kuba aba mu cyiciro cya mbere cyangwa icya kabiri cy’ubudehe bimwongerera amahirwe.

Ukuyemo abemerewe inguzanyo n’abemerewe bakagira ibindi byangombwa basabwa ndetse n’abatarigeze basaba inguzanyo ; usanga abanyeshuri batemerewe inguzanyo ari 1463 ugereranyije n’ abanyeshuri 11027 bemerewe kwiga muri Kaminuza y’u Rwanda.

Abanyeshuri bashya bemerewe kwiga muri Kaminuza y’u Rwanda bari mu mashami yayo atandukanye nkuko aherutse kuvugururwa arimo Koleji yigisha amategeko, ubukungu n’imiyoborere, CLEG (College of Law, Economics and Governance) ;Koleji y’Ubuvuzi n’Ubumenyi mu by’ubuzima, CMHS (College of Medicine and Health Sciences), Koleji yigisha iby’ubumenyi n’ikoranabuhanga, CST (College of Science and Technology), Koleji y’uburezi n’imicungire y’ububiko bw’inyandiko CELS (College of Education and Library Sciences) na Koleji yigisha ubuhinzi, ubumenyi mu buvuzi bw’amatungo n’ibidukikije, CAEVM (College of Agriculture, Environment and Veterinary Medicine).

Mu mwaka w’amashuri wa 2016/17 hasabye abanyeshuri 24,205 barimo 9,121 bifuzaga kwiga ibijyanye n’ubumenyi n’ikoranabuhanga, hemererwa gusa 17,165, barimo 6 899 bahawe kwiga ubumenyi n’ikoranubuhanga.

Kanda hano urebe Urutonde rw’abemerewe inguzanyo yo kwiga muri Kaminuza y’u Rwanda 2017-208



Tanga igitekerezo kuri iyi nkuru



Igitekerezo