Urubanza rwa Kizito Mihigo rwasubitswe mu gihe kitazwi

Umuhanzi Kizito Mihigo yitabye Urukiko rw’Ikirenga mu gitondo cyo kuri uyu wa Mbere ariko urubanza rwe ntirubashije kuba ndetse n’igihe ruzasubukurirwa ntikizwi ku mpamvu z’uko we n’abandi baburanyi bari baje mu rukiko bamenyeshejwe ko hari itangazo risubika imanza zabo hashingiwe ku mavugurura aherutse kubaho mu bucamanza.

Learn how to Thrive

Kuri uyu wa Mbere tariki ya 11 Kamena 2018 nibwo umuhanzi Kizito Mihigo yitabye Urukiko rw’Ikirenga mu rubanza ku bujurire bwe nyuma y’igihano cy’igifungo cy’imyaka 10 yakatiwe mu ntangiriro z’umwaka wa 2015 amaze kwemera ibyaha yarimo akurikiranwaha.

Kizito Mihigo wari kumwe n’abandi baburanyi bari kumwe bamenyeshejwe ko hari itangazo rigendanye no gusubika imanza zabo mu Rukiko rw’Ikirenga nk’uko byahamijwe na Me Mukamusoni Antoinette wunganira Kizito Mihigo uvuga ko basanze iri tangazo ryatanzwe ariko ngo rikaba ridasobanura neza igihe ababuranyi babo bazaburanira n’aho bazaburanira.

Ubwanditsi bw’Urukiko rw’Ikirenga butangaza ko nyuma y’amavugurura y’inkiko uru rubanza kimwe n’izindi manza zari mu rw’Ikirenga ubu zitakiri mu bubasha bwarwo kuko haherutse gusohoka itegeko rishyiraho urukiko rw’ubujurire.

Uru ni urukiko ruherutse gushyirwaho n’Itegeko Ngenga ryo muri Mata (ryasohotse mu igazeti mu mpera za Gicurasi 2018) , rukazajya ruburanisha imanza z’ubujurire aho kugira ngo zigere mu rw’Ikirenga.

Uru rukiko ariko ntiruratangira imirimo nubwo Itegeko rirwemeza ryasohotse tariki 30 Gicurasi ishize.

Itegeko rishya rigena uru rukiko rivuga ko Perezida, Visi Perezida n’abacamanza b’uru Rukiko bashyirwaho n’Iteka rya Perezida bamaze kwemezwa na Sena. Perezida wa Repubulika abanza kugisha inama Inama y’Abaminisitiri n’Inama Nkuru y’Ubucamanza.

Ingingo ya kane y’iri tegeko ivuga ko “Mbere yo gutangira imirimo, Perezida, Visi Perezida n’aba bacamanza b’Urukiko rw’Ubujurire barahirira imbere ya Perezida wa Repubulika.”

Iyi mirimo irubanziriza ntabwo irakorwa. Nirangira rugatangira imirimo imanza z’ubujurire ziri mu rw’Ikirenga zizahita ziburanishwa n’uru rukiko harimo n’uru rwa Kizito Mihigo

Umuhanzi Kizito Mihigo ufungiye muri gereza ya Nyarugenge iherereye i Mageragere mu mujyi wa Kigali, ubu amaze imyaka ine afunzwe ariko akaba mu mategeko agifatwa nk’umwere kuko atarahamwa n’ibyaha mu buryo ndakuka, dore ko hagitegerejwe ibizava mu bujurire yitabiriye uyu munsi.

Tariki 4 Mata 2014 niyo tariki bivugwa ko Kizito Mihigo yatawe muri yombi na Polisi y’u Rwanda akurikiranyweho ibyaha by’ubugambanyi bwo kugirira nabi ubutegetsi buriho cyangwa umukuru w’igihugu, gucura umugambi w’ibikorwa by’iterabwoba no gufasha kurema umutwe w’abagizi ba nabi. Gusa tariki 15 Mata 2014, nibwo Polisi yamweretse itangazamakuru, nyuma y’igihe yaraburiwe irengero maze hatangazwa ibyaha akurikiranyweho nawe ubwe yiyemereraga. Ubu hashize imyaka irenga ine afunzwe nk’utarahamwa n’ibyaha nyuma yo kujuririra ibihano yari yarahawe.

Tariki 27 Gashyantare 2015, nibwo Kizito Mihigo yahamijwe ibyaha bitatu birimo kurema umutwe w’iterabwoba, kugambirira kugirira nabi ubutegetsi buriho n’icyaha cyo gucura umugambi w’ubwicanyi, hanyuma ahanishwa igifungo cy’imyaka 10. Gusa yahise ajurira, kugeza ubu bikaba byari bitegerejwe ko azongera akagezwa imbere y’urukiko rw’ikirenga aburanishwa kuri ibi byaha.

Hari hashize igihe kirenga imyaka itatu urubanza rw’ubujurire bwe rutaraburanishwa. Nyuma yo kubona umwaka wa 2015 warangiye atarahabwa itariki yo kuburana ndetse n’umwaka wa 2016 akabona urimbanyije, Kizito Mihigo mu ntangiro z’umwaka wa 2016 yandikiye urukiko rw’Ikirenga abatakambira asaba ko yahabwa itariki ya vuba yo kuburana, ariko bamubwira ko ibyo bitashoboka, ko hari abandi benshi bajuriye mbere ye kandi nabo bakaba ari abanyarwanda bafite uburenganzira nk’ubwe, bityo akaba agomba gutegereza akagerwaho, igihe cyazagera akazamenyeshwa igihe azaburanira.

Uwahoze ari umuvugizi w’Inkiko z’u Rwanda, Itamwa Emmanuel, icyo gihe yabwiye ikinyamakuru Ukwezi.com ko igihe gishize Kizito Mihigo ajuririye igihano yahawe, atari kinini akurikije umubare w’imanza ziba ziri mu rukiko rw’Ikirenga. Yagize ati: "Kizito Mihigo ntiyibagiranye kandi imyaka ishize si myinshi ukurikije imanza ziba ziri mu rukiko rw’Ikirenga, ahubwo ntaragerwaho kandi bagenda baburanishwa bitewe n’igihe ibirego byabo byakiriwe. Ntabwo mu rukiko rw’Ikirenga bagena itariki yo kuburanisha bagendeye ku muburanyi ahubwo bagendera ku kirego n’igihe cyatangiwe, ubu rero ntaragerwaho ni ugutegereza nagerwaho muzabimenya."

Kizito Mihigo uri kuburanishwa bujurire mu, ntabwo ashobora guhabwa igihano kirenga imyaka 10 yari yakatiwe mbere. Kuba ubushinjacyaha bwo butarajuririye iki gihano yari yahawe, bituma Urukiko rw’Ikirenga rutamuha igihano kirenze icyo yahawe n’Urukiko rukuru, bivuga ko ibihano bishoboka ari imyaka 10 cyangwa iri munsi yayo, cyangwa se kugirwa umwere urukiko rusanze icyaha kitamuhama.

Ubu Kizito Mihigo amaze imyaka irenga ine afunzwe by’agateganyo, ariko nakatirwa imyaka azaba amazemo izakurwa mu gihano yaba yahawe, bivuga ko imyaka asigaje muri gereza uko byagenda kose itarenga 6.

PNG - 509.8 kb
Kizito Mihigo wamamaye mu Rwanda, ubwo yari umuhanzi kuri ubu akaba akurikiranywe n’ubutabera ku byaha bitandukanye nawe yemera ko yakoze

@Umubavu.com


Travel for Free!


Tanga igitekerezo kuri iyi nkuru



Igitekerezo