Urubanza rw’abayoboke ba FDU rwasubitswe kubera  ba Avoka

Urukiko Rukuru rwasubitse urubanza mu bujurire rw’abayoboke umunani b’ishyaka ritemewe mu Rwanda, FDU-Inkingi, ku mpamvu y’uko ababunganira Me Gatera Gashabana na Mukamusoni Antoinette batabonye umwanya wo gutegura imyanzuro y’ubujurire.

Urukiko Rwisumbuye rwa Nyarugenge ruheruka gutegeka ko Twagirimana Boniface wemera ko ari Visi Perezida w’Ishyaka rya FDU Inkingi, Ndayisenga Papias, Nsabiyaremye Gratien, Mbarushimana Evode, Gasengayire Leonille, Ufitamahoro Norbert, Twagirayezu Fabien na Nkiko Erneste bafungwa iminsi 30 y’agateganyo.

Aba bose kuri uyu wa Kane bagaragaye mu Rukiko Rukuru bambaye impuzankano y’iroza iranga abagororwa mu Rwanda, bashinjwa icyaha cyo kurema umutwe w’ingabo utemewe n’icyaha cyo kugirira nabi ubutegetsi buriho.

Umucamanza yabajije niba abaregwa biteguye kuburana maze ababunganira bavuga ko batiteguye kuko batabonye umwanya wo gutegura imyanzuro y’ubujurire. Ni amagambo atakiriwe neza n’ubushinjacyaha bwasabye ko aba bunganizi bihanangirizwa ku mpamvu yise ‘uburangare’ kuko babonye umwanya ntibawukoreshe.

Me Mukamusoni yagarutse ku magambo y’ubushinjacyaha yibaza impamvu burakajwe n’isubikwa ry’urubanza kandi atari bwo bufunzwe. Umucamanza yategetse ko urubanza mu bujurire ruzaburanishwa ku wa 12 Ukwakira 2017.

Mu iburanisha ku ifungwa n’ifungurwa ry’agateganyo, umushinjacyaha yavuze ko intandaro y’ibyaha baregwa ari ihuriro ryashyizweho ryitwa P5 rigizwe na FDLR, CNRD, RNC, PS-Imberakuri, FDU -Inkingi na PDP Imanzi. Aba barimo abayobozi n’abayoboke ba FDU bakaba bari mu mugambi wa ririya huriro wo kurema umutwe wa gisirikare uhuriweho wo kurwanya ubutegetsi bw’u Rwanda.

Bashinjwa kandi kwakira inkunga binyuze kuri Western Union bakayikoresha mu gushaka abajya muri uriya mutwe, kubashakira ibyangombwa n’amatike azabageza muri Repubulika Iharanira Demokarasi ya Congo aho ukorera.

Ubushinjacyaha buvuga ko hari batanu bamaze kugera muri uriya mutwe ndetse ko mu gusaka babonye ‘agenda’ ya Boniface Twagirimana, Visi Perezida wa mbere wa FDU irimo amazina y’abagiye, bikaba byarashimangiwe n’ibaruwa y’Ibiro bishinzwe Abinjira n’Abasohoka yemeje ko banyuze ku mupaka wa Rusizi.

Mu baregwa kandi harimo batatu bashinja abayobozi bakuru ba FDU kubakangurira kujya muri icyo gisirikare gihuriweho, ndetse bakaba baranemeye ko babahaga amafaranga yo gushaka ibyangombwa, amatike n’ibindi.

Mu kwiregura bamwe mu baregwa bavuze ko bazira impamvu za politiki kuko ibikorwa bakora bigamije gushaka abayoboke ba FDU-Inkingi, nka kimwe mu bigenderwaho ngo ishyaka ryemerwe mu Rwanda.

Ku rundi ruhande ariko uwitwa Papias Ndayishimiye na Nkiko Ernest bemeye ko bafashwe bagiye kujya gutanga ubufasha mu mitwe y’ingabo itemewe. Gusa nawe yahakanye inyito y’icyaha yo kurema uwo mutwe.

Ku wa 6 Nzeri nibwo Polisi y’Igihugu yatangaje ko yataye muri yombi abantu bakurikiranyweho kuba mu mitwe yitwaje intwaro ikorera mu gihugu gihana imbibi n’u Rwanda, barimo batatu bafashwe ubwo berekezaga mu myitozo ya gisirikare hanze y’u Rwanda.



Tanga igitekerezo kuri iyi nkuru



Igitekerezo