Umunyarwandakazi yafatiwe muri Uganda afite  Cocaine ajyanye  muri Mali

Polisi ishinzwe umutekano ku kibuga cy’indege cya Entebbe yatangaje ko ejo ku Cyumweru tariki 26 Ugushyingo 2017 yafashe Umunyarwandakazi, Beatrice Isaro afite ibiyobyabwenge ku kibuga cy’ Indege cya Entebbe muri Uganda.

Chimpreports dukesha iyi nkuru ivuga ko Beatrice Isaro, usanzwe ari umuforomokazi yafashwe hifashishijwe ibyuma bikoreshwa n’ ikoranabuhanga biherutse kubakwa ku kibuga cy’ indege cya Entebbe.

Polisi ya Uganda ikomeza ivuga ko ibi biyobyabwenge byo mu bwoko bwa Cocaine byafashwe . byari bifite agaciro ka miliyoni 397 y’ amashilingi akoreshwa muri Uganda.

Umuvugizi w’ iperereza muri ako gace , Vincent Ssekate yemeje nawe ko ibyo biyobyabwenge byafatiwe mu gukapu k’ uyu munyarwandakazi yari yitwaje mu rugendo rwe.

Akomeza avuga ko ibikoresho bafite ubu bikomeye ku buryo bidahusha gutanga amakuru nk’ aya, ni ukuvuga ngo byavumbuye iyi cocaine aho yari izingiye mu myenda , mu nkweto ndetse no mu mpapuro byari mu gikapu cya Isaro.

Ngo Isaro ufite urupapuro rw’ inzira nimero EC 298229 yafatanywe ikiro 1.59 cya cocaine yarajyanye i Bamako mu murwa mukuru wa Mali. Akaba yarahise atabwa muri yombi we na Haruna Koli bari bafatanyije urugendo.

Akimara gufatwa, Isaro yasobanuriye polisi ko icyo gikapu yari yagihawe n’ inshuti ye yitwa Ali imutuma kugishikiriza umuvandimwe we uba i Bamako.

Ubwo yabazwaga impamvu imujyanye muri Mali, Isaro yavuze ko afite inshuti yitwa Mitchel yamusabye kujya kumurangurira ibicuruzwa muri Mali bityo bikazacururizwa i Kigali mu Rwanda.

Isaro abaye mugore wa kabiri ufatiwe ku kibuga cy’ indege cya Entebbe akekwaho ubucuruzi bwa Cocaine mu kwezi kumwe kuko uwitwa Allen Nankanja yafashwe agerageza kwinjiza cocaine muri Uganda ayikuye muri Brazil.

JPEG - 124.3 ko
Isaro Beatrice wafashwe(wipfutse mu maso) ari kumwe n’Umuvugizi w’ubugenzacyaha



Tanga igitekerezo kuri iyi nkuru



Igitekerezo