Umunsi w’isabukuru y’amavuko wa Mugabe wagizwe ikiruhuko mu gihugu cyose

Umunsi w’isabukuru y’amavuko wa Robert Mugabe wayoboraga Zimbabwe, wagizwe umunsi w’ikiruhuko mu gihugu cyose ku bakozi bose mu rwego rwo kuzirikana uruhare rwe yagize muri politiki y’iki gihugu kuva kibonye ubwigenge ku iatriki 18 Mata 1980.

Uyu munsi wemejwe nyuma y’aho mu kwezi kwa 8 abarwanashyaka b’ishyaka riri ku butegetsi ZANU-PF bagaragaje ko bifuza ko uyu munsi wagirwa ikiruhuko ku bakozi bose icyifuzo byarangiye kibaye gishyizwe mu bikorwa.

Robert Gabriel Mugabe yavutse ku iariki ya 21 Gashyantare 1924, mu rwego rwo kuzirikana icyo uyu mukambwe yamariye igihugu cya Zimbabwe byatumye hafatwa umwanzuro ko ku itariki ya 21 Gashyantare buri Mwaka, Zimbabwe izajya yizihiza umunsi w’urubyiruko ukagirwa ikiruhuko rusange ku bakozi bose.

Itegeko ryo kwizihiza umunsi Robert Gabriel Mugabe yavutseho no kuwugira ikiruhuko rusange ryasohotse mu igazeti ya Leta kuwa gatanu itariki 24 Ugushyingo 2017 ari na wo munsi Emmerson Mnangagwa wamusimbuye yarahiriye gutangira imirimo yo kuba Perezida mushya w’Igihugu cya Zimbabwe.

Ibi bibaye nyuma y’aho Mugabe w’imyaka 93 aherutse kwegura ku butegetsi bwa Zimbabwe nyuma y’imyaka 37 ayiyoboye. Uyu mukabwe yafashe icyemezo cyo kwegura nyuma y’igitutu yashyizweho n’ingabo ndetse n’abagize ishyaka rya Zanu-PF riri ku butegetsi.

Muri kwezi kwa Kanama uyu mwaka, nibwo guverinoma yatangiye kwiga ku mwanzuro wo gutanga konji ku munsi w’amavuko ya Mugabe nyuma y’aho urubyiruko rwo mu ishyaka riri ku butegetsi rya Zanu-PF rwari rumaze iminsi rubisaba.

Kuri ubu igihugu cya Zimbabwe kiyobowe na Emmerson Mnangagwa wavutse ku itariki ya 15 Nzeli 1942. Yabaye Visi Perezida wa Zimbabwe kuva mu mwaka wa 2014 ku itariki ya 12 Ukuboza kugeza mu mwaka wa 2017 ku itariki ya 6 Ugushyingo 2017 ubwo yirukanwaga ku mirimo ye na MUgabe.

Robert Mugabe nyuma y’ imyaka isaga 37 yose ku butegetsi, yeguye ku mirimo ye ku itariki ya 21 November 2017, yavutse ku itariki ya 21 Gashyantare 1924, yagiye ku butegetsi ku itariki ya 31 Ukuboza mu mwaka wa 1987.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo