Umuhinde yashyikirijwe asaga miliyoni 13 yari yibwe n’umukozi we

Ku itariki ya 17 Kanama Polisi ikorera mu Mujyi wa Kigali yashyikirije Umuhinde witwa Chandra Kumar, uyobora kompanyi y’iby’ingendo zo mu mahanga Waheguru Travels Ltd , amafaranga 13,600,000 yari yibwe n’umukozi we bari bamaranye imyaka irenga ibiri.

Polisi ikorera mu karere ka Kayonza ku bufatanye na Polisi ikorera mu karere ka Nyarugenge yashyikirijwe ikirego, yafatiye uwitwa Yvan Twahirwa mu mudugudu wa Gakoma, akagari ka Buhabwa, umurenge wa Mwiri mu karere ka Kayonza. Mu ifatwa rye, bamusanganye amafaranga 13,563,600 andi akavuga ko yayakoresheje mu rugendo. Aya mafaranga akaba yaribwe ku itariki ya 16 Kanama ahagana saa yine z’amanywa akaza gufatwa mu gitondo cyo ku italiki ya 17 Kanama.

Umuhango wo kuyashyikiriza uwibwe wabereye ku cyicaro cya Polisi ikorera mu Mujyi wa Kigali, uyoborwa n’umuyobozi wa Polisi mu Mujyi wa Kigali, ACP Rogers Rutikanga ahari hateraniye n’itangazamakuru ritandukanye.

Umuyobozi wa Polisi mu Mujyi wa Kigali yavuze ko byaje kugaragara ko ari umugambi yari yacuze, maze agira abantu muri rusange inama yo kujya bakoresha abantu b’inyangamugayo kandi abasaba kujya bihutira kumenyesha Polisi y’u Rwanda mu gihe bibwe kandi abasaba kujya batanga amakuru ajyanye n’igikorwa icyo aricyo cyose kinyuranyije n’amategeko nk’uko uriya muhindekazi yabigenje.

Aha yagize ati :” Iyo amakuru atangiwe igihe nk’uko byagenze kuri ubu bujura, nta kabuza umunyacyaha arafatwa kandi murabona ko nta n’umunsi urenga bifashe kandi yari yamaze kugera kure ; tuboneyeho no kwibutsa abafite imitungo itandukanye kwishyiriraho ingamba zo kurinda ibyabo Polisi ikaza ibunganira.”

Mu gusoza , ACP Rutikanga yagize ati :” U Rwanda rugomba kuba intangarugero mu mutekano kuko aricyo kintu dufite nk’umusingi w’ibindi byose, ingamba kuri ibyo ni uguhora twigisha ariko tugakomeza n’ubufatanye n’abaturage ku buryo ibyaha biburizwamo kandi n’uwibye cyangwa akoze ikindi cyaha agafatwa akabihanirwa.

Avugana n’itangazamakuru, Chandra yavuze ko yahaye umukozi we sheki agomba kubikuza amafaranga twavuze haruguru agahita ayamuzanira aho bakorera mu mugi wa Kigali, abonye ko aho yatumye umukozi we atari kure kandi arimo gutinda, akomeza kumubeshya kuri telefoni ngo araje, ahita abimenyesha sitasiyo ya Polisi ya Nyarugenge nayo yahise itangira ibikorwa byo gushakisha irengero ry’uriya mugabo kugeza afashwe.

Nyuma yo gushyikirizwa amafaranga yari yibwe, Shandra yagize ati : "Polisi nayimenyesheje ko nibwe, numva ko byanze bikunze iri bufate amafaranga yanjye ndetse n’uwanyibye. Ni nako byagenze kuko uyu munsi mu gitondo yampamagaye imbwira ko amafaranga nari nibwe yafashwe inambwira kuza kuyafata none ndayashyikirijwe ; mboneyeho gushimira Polisi ku kazi gakomeye yankoreye nkaba mbonye ibyo nari nibwe".

Ingingo ya 300 ivuga ko ibihano ku bujura budakoresheje kiboko cyangwa ibikangisho ivuga ko, umuntu wese ukora ubujura budakoreshejwe kiboko cyangwa ibikangisho ahanishwa igifungo kuva ku mezi atandatu (6) kugeza ku myaka ibiri (2) n’ihazabu y‟amafaranga y’u Rwanda yikubye inshuro kuva kuri ebyiri (2) kugeza kuri eshanu (5) z’agaciro k’icyibwe cyangwa kimwe gusa muri ibyo bihano.



Tanga igitekerezo kuri iyi nkuru



Igitekerezo