Ukuri ku Barundi 4 bafatiwe muri Kenya bagiye muri Al Shabaab

Ambasade y’u Burundi muri Kenya yemeje ko hari Abarundi 4 bafungiye muri i Nairobi nyuma yo gufatwa bagiye muri Somalia kwiyunga n’umutwe w’Iterabwoba wa Al Shabaab.

Ambasaderi w’u Burundi muri Kenya,Remy Barampama avuga ko abo bagabo, babiri bava mu Buyenzi, umwe mu Kinama,undi i Gitega, biyemereye ko bari bagiye kwiyunga n’umtwe wa al-Shabab.

Amb.Barampama akomeza avuga ko bafite gahunda yo kuganira n’abafashwe mu cyumweru gitaha bityo hakaba hanamenyekana n’uwabafashije kwinjira muri uyu mutwe.

Ku wa Kabiri tariki 12 Nzeri 2017 nibwo igipolisi cya Kenya cyafashe uwitwa Ntakarutimana Bernard w’imyaka 41, Niyongere Yusuf w’imyaka 32, Nshimirimana Fulgence Shadady w’imyaka 31 na Bizoza w’imyaka 20.

Polisi ivuga ko aba bafatiwe mu Ntara ya Isiolo berekeza muri Somalia.

Kenya n’u Burundi bifite ingabo muri Somalia, aho zihanganye n’abarwanyi ba Al Shabaab.

Gusa Kenya nk’igihugu gituranye na Somalia, nicyo gikunze kugabwaho ibitero n’abarwanyi b’uyu mutwe, abaturage batari bake bakahasiga ubuzima.

Ubushakashatsi bwakozwe n’ikinyamakuru International Business Times mu mwaka wa 2014, bwagaragaje ko umutwe wa Al shabaab uri mu mitwe ifite amafaranga atari make, ari nayo ukoresha mu kubona abarwanyi.

Muri uwo mwaka, Al Shababaab yabarirwaga akayabo ka Miliyoni 70 z’amadorali ya Amerika, aya mafaranga amenshi ngo ukaba uyavana mu bucuruzi bw’amakara.

Gabriel Habineza/Umubavu.com



Tanga igitekerezo kuri iyi nkuru



Igitekerezo