Uganda : Yahagaritswe ku kazi azira kwambara impenure

Rosemary Namuwanga wari usanzwe ari umukozi w’urukiko mu gihugu cya Uganda, yahagaritswe ku mirimo ye kubera kwambara utwenda tugufi cyane. Uyu yakoze ibi yirengagije itegeko ryari ryatanzwe na Leta ribibuza ndetse n’uru rukiko rukavuga ko bitanga isura mbi kuri rwo.

Uyu mukozi w’urukiko rwa Kasangati rubarizwa mu karere ka Wakiso mu gihugu cya Uganda yahagaritswe ku kazi ku itariki ya 21 Nzeli uyu mwaka azira imyifato itari myiza yo kwambara utujipo tugufi cyane bivugwa ko dutanga isura mbi ku rukiko cyane ko na Leta y’iki gihugu ubusanzwe itabyemera.

Rosemary Namuwanga yakiriye ibaruwa imusaba kuba ahagaze ku mirimo ye mu gihe kingana n’ibyumweru bibiri byose azira kwambara utujipo tw’impenure. Nyamara Leta ya Uganda ntisiba gusaba abakozi bayo bose kwiyubaha no kubaha imirimo bakora bambara imyenda ibubahisha ndetse ikanubahisha abanyagihugu kuko ari bo bakorera.
Uyu mukozi yandikiwe ibaruwa n’umunyamabanga uhoraho muri Minisiteri y’ubutabera, Josephine Muwonge amusaba kuba ahagaze ku mirimo ye.

Iyi baruwa yagiraga iti “ turagira ngo tukumenyeshe ko uhereye none tariki ya 21 Nzeli 2017, utumiwe mu biro by’umunyamabanga mukuru kugira ngo wisobanure ku byo uregwa nkuko ikirego cyatugezeho mu kwezi kwa 7 kivuga ko wambara utwenda tugufi cyane bigahesha isura mbi urukiko ndetse na Minisiteri y’ubutabera muri rusange”.

Mu mwaka wa 2010,Leta ya Uganda yashyizeho amabwiriza y’imyambaro igomba kwambarwa n’abakozi ba Leta bose ariko bamwe na bamwe usanga batabyumva. Abagore ndetse n’abakobwa bakorera Leta mu gihugu cya Uganda ntibemerewe kwambara utwenda cyangwa utujipo tugera hejuru y’amavi ndetse n’imyenda ibegereye cyane.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo