Ubukene buravuza ubuhuha muri EAC, hagiye kwitabazwa inguzanyo

Ubunyamabanga bw’Umuryango wa Afurika y’Iburasirazuba bugiye kwitabaza inguzanyo ya miliyoni 3.38 z’amadolari yo mu kigega cy’ingoboka ngo bubone uko bwishyura imishahara n’ibindi bikoresho nyuma y’uko ibihugu biwugize bitinze kwishyura imisanzu yabyo.

Mu nama y’Abaminisitiri bafite mu nshingano ibikorwa bya EAC yabaye ku wa 21-25 Kanama 2015 mu Mujyi wa Arusha, basabye ubunyamabanga kugeza kuri Komite y’Imari n’Ubutegetsi amafaranga bashaka kugira ngo iyemeze.

Ikinyamakuru The East African dukesha iyi nkuru, ivuga ko ayo mafaranga azahita asubizwa mu gihe ibihugu bigize uwo muryango bizaba bimaze kwishyura imisanzu yabyo.

Raporo yakozwe n’iyo nama yagaragaje ko ibigo byinshi bya EAC bitabashije kuzuza inshingano zabyo uko bikwiye bitewe n’uko ibihugu byo mu muryango byananiwe kwishyura amafaranga bisabwa.

Abaminisitiri bavuze ko “gutinda kwishyura imisanzu ku bihugu byo muri EAC cyangwa kutishyura na gato, ari imbogamizi ku mikorere y’umuryango.”

Bongeyeho bati “ Ishami rishinzwe amategeko n’ubucamanza rikwiye guteganya ibihano kuri ibyo bihugu bidatanga umusanzu wabyo cyangwa bitinda kuwishyura.”

Iyo nama yanagaragaje ikibazo cyo kwemera ubusabe bwa Sudani y’Epfo bwo kwinjira muri EAC ivuga ko yagombaga kwishyura amadolari angana na 6,715,064 mu mwaka w’ingego y’imari wa 2016/17 gusa ngo ayo ntiyigezwe atangwa.

Itegeko rigenga iby’imisanzu muri EAC riteganya ko ibihugu byose bigomba kwishyura amafaranga angana.

Mu ngengo y’imari ya 2016/17 ibihugu bitanu bigize EAC byari bisigaje miliyoni 12.93 z’amadolari ku zigera kuri miliyoni 41.8$ byagombaga kwishyura, abaterankunga nabo bakishyura miliyoni 46.7 z’amadolari.

Kenya yonyine niyo imaze kwishyura. Uganda isabwa kwishyura ibirarane by’amadolari 73,830, u Rwanda 540 $, Tanzania 4,836 $ mu gihe u Burundi na Sudani y’Epfo bitarishyura na rimwe.

Umwaka ushize, Inteko Ishinga Amategeko ya EALA yaburiye u Burundi ko bushobora kuzajyanwa imbere y’urukiko rw’akarere kubera kunanirwa kwishyura umusanzu wabwo.

Ibihugu byose uko ari bitanu byasabwaga kwishyura miliyoni 8.3 z’amadolari umwaka ushize agafasha mu gutera inkunga ibikorwa bitandukanye n’ibigo byo muri uwo muryango.

Umusanzu rusange ku ngengo y’imari ya 2017/18 ni miliyoni 113.8 z’amadolari yavuye kuri miliyoni 101 z’amadolari yariho mu mwaka w’ingengo y’imari 2016/17.



Tanga igitekerezo kuri iyi nkuru



Igitekerezo