USA : Umukozi wa kera wa CIA arashinjwa kubika amabanga y’igihugu mu buryo bufifitse

Umukozi wa kera wo mu kigo cya Amerika gishinzwe iperereza (Central Intelligence Agency, CIA) yafatiwe muri iki gihugu ashinjwa kuba abitse amabanga y’igihugu mu buryo butemewe mategeko.

Jerry Chun Shing Lee, afite ubwenegihugu bwa Amerika, yafungiwe ku kibuga cy’indege cya JFK i New York ku munsi wa mbere nkuko bitangazwa n’ubutabera bwa Amerika.

Jerry Chun Shing Lee yatangiye gukorera CIA mu 1994

Uyu mugabo yakoreraga CIA hagati y’umwaka 1994 na 2007 nyuma akaba yarahise ajya muri Hong Kong.

Ibyatumye afatwa ngo bifitanye isano n’iperereza rya FBI ryatangiye mu mwaka wa 2012 ubwo urwego rwa CIA rukorera mu Bushinwa rwasenywaga.

Imyaka ibiri mbere yaho, abakozi b’uru rwego 20 barishwe abandi barafungwa bikaba byari ku nshuro ya mbere urwego rw’iperereza rwa Amerika rusuzugurwa by’agashinyaguro kugeza kuri iki kigero.

Itangazamakuru rya Amerika ryisunze amakuru aturuka mu bakora iperereza, rivuga ko ukekwa ari Bwana Lee ushobora kuba afasha igihugu cy’u Bushinwa.

U Bushinwa bwashenye CIA mu mugambi wo kuburizamo inzira Amerika yakoreshaga ibona amakuru nkuko New York Times ibivuga.

Jerry Chun Shing Lee ni muntu ki ?

Bwana Lee, uzwi kandi ku izina rya Zhen Cheng Li, yakoze mu gisirikare cya Amerika hagati ya 1982-1986 nkuko amakuru ava mu bimenyetso by’urukiko abivuga.

Yatangiye gukora muri CIA mu 1994 nk’umuhanga mu byo guhererekanya amakuru mu buryo bw’ibanga rikomeye, gushaka abakozi bashya b’urwego ndetse no kubahemba.

Yashyizwe ku rutonde rw’abagifite amabanga ya CIA ndetse anatera igikumwe kuri aya masezerano yo kutazamena ibanga.

Ubwo Bwana Lee yavaga muri CIA muri 2007, abamuzi bavuga ko yavuye muri icyo kigo cy’iperereza ashavujwe nuko akazi ke kasaga nk’akarangiye nkuko New York Times bakomeza babivuga.

Bwana Lee ashinjwa iki ?

Minisiteri y’Ubutabera ivuga ko Bwana Lee w’imyaka 53 y’amavuko ashinjwa kuba afise bidaciye mu mategeko amabanga yo muri Minisiteri y’ingabo y’igihugu, akaba ashobora gufungwa igihe cy’imyaka igera ku icumi mu gihe yaba ahamye n’ibyo aregwa.

Icyakora ngo ntashinjwa kwiba amabanga y’uru rwego mu gihe byo bihanishwa igihano cy’urupfu gusa hakaba hari amakuru avuga ko ubutegetsi bwa Amerika budashaka kumenera amabanga mu rukiko mu gihe FBI byayigoye kwegeranya ibirego.

Ibimenyetso by’urukiko nta na hamwe bivugwa ko hari imigenderanire Bwana Lee yaba yaragiranye n’ubutegetsi bw’u Bushinwa gusa amakuru ava mu bashinzwe iperereza akavuga ko aribyo uyu mugabo nawe ubwe yikekaho.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo