U Rwanda ku mwanya wa 2 muri Afurika mu gutanga serivisi zinoze

Icyegeranyo cy’ ihuriro ry’ isi mu by’ubukungu giheruka cya 2017-2018 gishyira u Rwanda ku mwanya wa 2 muri Afrika y’ Iburasirazuba mu mitangire ya servisi inoze, rukaba urwa 2 ku mugabane wa Afrika na ho ku isi rukaza ku mwanya wa 41 ruvuye kuwa 107 mu cyegeranyo giheruka cya 2014-2015.

Iki cyegeranyo gisohotse mu gihe hari kwizihizwa icyumweru icyumweru cyahariwe gutanga servisi nziza ku bakiriya gifite insanganyamatsiko igira iti ”Kubaka Icyizere mu bakugana”.

Nubwo u Rwanda ruza kuri uyu mwanya, ntibikuraho kuba hakiri ibigo bimwe na bimwe bigitungwa agatoki mu gutanga serivisi zitanoze nubwo leta idahwema gukaza ingamba mu guhangana na byo.

Aha usanga servisi zitangirwa mu buvuzi , mu mabanki n’ahandi, ari zimwe mu nzego zakomeje gutungwa agatoki mu minsi yashize kuba zitajyanye n’ icyerekezo igihugu cyihaye.

Umuyobozi mukuru wungirije w’urwego rw’igihugu rushinzwe iterambere, RDB ,Emmanuel Hategeka avuga ko nubwo uko iminsi yicuma ariko imitangire ya servisi igenda inoga, gusa avuga ko hakiri intera bitewe n’icyerekezo igihugu cyihaye mu iterambere gusa na we agatunga agatoki abikorera.

Agira ati”abikorera ni bo shingiro ry’ ubukungu bw’ igihugu, ari imibare tugenda tubona ni uko ababagana batarishimira imitangire ya servisi babona, ni yo mpamvu muri iki cyumweru cyahariwe abakiriya twongera gukangurira cyane cyane abikorera gushyiraho umwete mu gutanga servisi bakumva ko umukiriya cyangwa uza abagana asaba servisi ari we utuma babaho ari nawe utuma ibyo bakora bibateza imbere.”

Ku ruhande rw’umuyobozi ushinzwe ubukerarugendo muri RDB, Kaliza Belise atangaza ko aka ari akanya ko kurushaho gutega amatwi abagana ibigo bitanga servisi mu rwego rwo kunoza imikorere bitewe n’icyo ababagana bakeneye.

Gusa RDB ivuga ko imitangirwe ya serivisi itanoze ari kimwe mu bibangamira iterambere rirambye ry’igihugu.

U Rwanda ruje kuri uyu mwanya rubikesha ibikorwa bimwe na bimwe bijyanye n’iterambere rwimakaje birimo kurwanya ruswa, kwagurira amasoko abarugana, ukutayegayega mu mutekano n’ibindi.

Ku mwanya wa Mbere haza Mauritius, na ho u Rwanda rugakurikirwa ku mwanya wa 3 n’Afurika y’Epfo.



Tanga igitekerezo kuri iyi nkuru



Igitekerezo