U Buhinde : Umwana w’ukwezi kumwe gusa yakuwe amenyo arindwi yose

Abaganga bo mu bitaro bimwe biri mu ntara ya Gujarat mu burengerazuba bw’u Buhinde bakuye amenyo arindwi umwana w’ukwezi kumwe.

Nkuko umwe mu baganga b’ibi bitaro Dr Meet Ramatri wabaze uyu mwana abitangaza, ubu ngo uwo mwana ameze neza nta kibazo na kimwe afite.

Aba baganga kandi bavuze ko bifashishije uburyo bubiri mu kumubaga. Ubwa mbere bamukuye amenyo ane, nyuma bamukura ayandi atatu. Ayo menyo y’uwo mwana yabonetse nyuma y’iminsi mikeya amaze kuvuka.

Ababyeyi be bahise bamujyana kwa muganga ubwo bari bamaze kubona afite ikibazo cyo konka. Nyuma yo kumusuzuma, umuganga wa mbere yahise amwohereza ku muganga wa kabiri ari we Ramatri.

Nkuko tubikesha BBC, Dr Ramatri yagize yagize ati “maze kwakira uyu mwana naramusuzumye musangana amenyo arindwi, nyuma byahise biba ngombwa ko akurwa aya menyo ariko abanje kubagwa”.

Dr Meet Ramatri yakomeje agira ati "Ubu uwo mwana aronka neza cyane nta kibazo”. Kuri ubu ngo igisigaye ni ukumenya niba kubagwa k’uyu mwana bidashobora gutera ikibazo cyo kutazongera kumera andi menyo mu minsi iri imbere.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo