U Budage  burohereza mu Rwanda ushinjwa ibyaha bya Jenoside

U Budage burohereza mu Rwanda Umunyarwanda witwa Twagiramungu Jean ushinjwa kuba yarasize akoze Jenoside mu yahoze ari Perefegitura ya Gikongoro.

Nk’uko ubushinjacyaha bw’u Rwanda bwabitangaje Jean Twagiramungu yatawe muri yombi ari mu Budage mu myaka ibiri ishize mu Mujyi wa Frankfurt.

Umuvugizi w’Ubushinjacyaha mu Rwanda, Nkusi Faustin, yavuze ko Twagiramungu uza kugezwa mu Rwanda saa munani z’amanywa, ashinjwa ibyaha bibiri birimo cya Jenoside n’icyo kurimbura imbaga.

Twagiramungu wari umwarimu i Kaduha muri Gikongoro, Nkusi avuga ko ibyaha bamushinja yabikoreye muri Komini Rukondo n’iya Karama, zose z’iyari Gikongoro.

Twagiramungu ni uwa mbere u Budage bugiye kohereza mu Rwanda ushinjwa ibyaha bya Jenoside yakorewe Abatutsi ariko bwagize uruhare mu gukurikirana ababishinjwa barimo Rwabukombe Onesphore wari Burugumesitiri wa Komini Muvumba mu yahoze ari perefegitura ya Byumba.

U Rwanda ntirusiba guhamagarira ibihugu bicumbikiye abashinjwa ibyaha bya Jenoside kubata muri yombi bikabohereza mu Rwanda aho basize bakoreye ibyaha cyangwa bikababuranisha.

Srce:Igihe



Tanga igitekerezo kuri iyi nkuru



Igitekerezo