Trump yongeye Koreya ya Ruguru ku bihugu byaciwe muri Amerika

Perezida wa Amerika Donald Trump yashyizeho amabwiriza mashya aca ingendo muri Amerika ku baturage ba Koreya ya Ruguru, Venezuwela na Chad.

Ni ku nshuro ya mbere Bwana Trump ashyize ibyo bihugu ku rutonde rw’ibitemerewe kugira abaturage babyo bajya muri Leta Zunze Ubumwe za Amerika.

Icyi cyemezo gikurikiye isubirwamo ry’urwego rw’umutekano rigasimbura ikindi cyemezo cyari kiri hafi kurangira. Trump yavuze ko ngo intego ye ya mbere ari ukugira ngo Amerika irusheho gutekana.

Abayobozi bavuga ko iki cyemezo kibasira abantu runaka kandi bikanaba bitandukanye kuri buri gihugu. Ku banya Siriya n’abanya Koreya y’amajyaruguru ntibemerewe namba kujya muri Amerika mu gihe kuri Venezuwela icyemezo kireba abayobozi bari muri guverinoma gusa (ndetse n’imiryango yabo).

Sudani yakuwe ku rutonde rw’ibihugu bitandatu byiganjemo abayisilamu byari byaciwe ku nshuro ya mbere (ariko kimwe na Siriya, Irani, Libiya, Somaliya na Yemeni biracyari kuri uru rutonde rw’icyemezo gishya). Ni ubwa gatatu iki cyemezo cyamagaywe na benshi kikanajyanwa mu nkiko, kivugururwa.

White House yavuze ko Koreya ya Ruguru itakoranye na guverinoma ya Leta Zunze Ubumwe za Amerika "mu buryo ubwo ari bwo bwose" ndetse inanirwa kubahiriza ibisabwa. Kubera iyo mpamvu rero ingendo ku baturage bayo muri Amerika zarahagaritswe.

Chad, nubwo iki gihugu ari umufatanyabikorwa mu bikorwa byo kurwanya iterabwoba, ntiyigeze isangira amakuru y’ingenzi yerekeye iterabwoba yasabwe na Leta Zunze Ubumwe za Amerika. Impushya zo kujya muri Amerika ku baturage bayo zarahagaritswe.

"Abategetsi bamwe muri guverinoma ya Venezuwela n’imiryango yabo ya hafi ni bo bahagaritswe.

Iki cyemezo kizatangira gushyirwa mu bikorwa ku itariki ya 18/10 ariko ibiro by’umukuru w’igihugu, White House, byavuze ko kitazareba abasanzwe bafite impushya zo kujya muri Leta Zunze Ubumwe za Amerika.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo