Rwanda:Imvura yangije   inzu 293 na hegitari 178 z’imyaka  mu minsi 5 gusa

Iyo imvura iguye ku rugero rukwiriye iba isoko y’uburumbuke, ubukungu n’iterambere ; ariko imvura ivanze n’umuyaga mwinshi itera ibyago bigira ingaruka ku mibereho y’abaturage n’umutekano wabo.

Mu byago biterwa n’imvura y’amahindu cyangwa irimo imiyaga myinshi ikomeye harimo kuba isenya amazu ; aho ibisenge by’amwe muri yo biguruka, inkuta zayo zikagwa cyangwa zikiyasa ; ndetse hari n’igihe zigwira abarimo imbere, bamwe bikabaviramo urupfu, abandi bagakomereka.

Imibare itangazwa na Minisiteri y’Imicungire y’Ibiza n’Impunzi igaragaza ko kuva uku kwezi gutangiye kugera ku itariki 5 imvura yaguye mu bice bitandukanye by’igihugu yangije inzu zituwemo 293, hegitari 178 z’imyaka n’imiyoboro ibiri y’amashanyarazi ; kandi ko yasenye ibyumba by’amashuri bitatu, insengero enye n’inyubako za Leta ebyiri.

Iyi Minisiteri igaragaza kandi ko ibyago byatewe n’imvura yaguye muri iyo minsi itanu byakomerekeje abantu batanu ; bihitana amatungo abiri.

Umuvugizi wayo, Twishime Claude yavuze ko abenshi mu bo yasenyeye batuye mu manegeka ; abandi bakaba bari batuye mu mazu adakomeye, atanaziritse.

Yagiriye abantu inama yo kuzirika ibisenge by’inzu zabo kugira ngo umuyaga utabigurukana, kwirinda gutura mu manegeka ; kandi asaba abahatuye kuhimuka bakajya gutura ahadashyira buzima bwabo mu kaga.

Yagize ati,"Buri wese aributswa gucukura umwobo ujyamo amazi ava ku nzu kugira ngo atagira uwo asenyera ; kandi asabwa kuwutwikiriza ikintu gikomeye kugira ngo hatagira uwugwamo. Abantu bakwiye kandi gusibura imiyoboro y’amazi kugira ngo akomeze aho agenewe kujya. Iyo hagize ikiyazitira ahindura icyerekezo ; bityo akaba yateza ibyago birimo no kuba yasenya amazu."



Tanga igitekerezo kuri iyi nkuru



Igitekerezo