Rutsiro : Bararira ayo kwarika nyuma yo gutaburuzwa imibiri y’ababo bizezwa ingurane none amaso yaheze mu kirere

Nyuma yo gusenyerwa no gutaburuzwa imibiri y’ababo bari barashyinguye kera,bagategekwa kubajyana mu irimbi aho bari bashyinguye hakubakwa imidugudu,abaturage bo mu murenge wa Mushubati, Akarere ka Rutsiro,amaso yaheze mu kirere aho bategereje ingurane z’imitungo yabo bikamera nko gutegereza Mesiya.

Nyuma yo kumara hafi umwaka bakuwe mu mitungo yabo n’ubuyobozi bushaka kubakamo umudugudu w’ikitegererezo n’imihanda ijya muri uyu mudugudu bamwe muri aba baturage bakodesherejwe aho kuba gusa hari n’abandi batigeze bahabwa aho kuba bacumbitse mu gihe batarahabwa ingurane yabo ngo nabo babashe kubaka, kugeza ubu aba baturage bavuga ko bagiye kumara hafi umwaka batakambira ubuyobozi bw’aka karere ariko bukirengagiza ikibazo cyabo ari naho bahera basaba gutabarwa.

Musoni Etienne wo mu mudugudu wa Gitega, Akagari ka Mageragere,umurenge wa Mushubati mu kiganiro yahaye ikinyamakuru ukwezi yavuze ko bari kwibaza icyo bazakora kuko bari mu gihirahiro nyuma yo kwimurwa ndetse bagataburuzwa imibiri y’ababo bari barashyinguye mu masambu yabo bakizezwa ko bazahabwa ingurane bitewe n’uko aho hari hagiye kubakwa umudugudu kugeza ubu amaso akaba yaheze mu kirere.

Yagize ati :’’baraje badusenyera amazu, bafata imva z’abantu bacu twari twarashyinguye mu ngo zacu barabadutaburuza tubajyana gushyingura mu irimbi rusange hanyuma batubwira ko buzaduha amafaranga none hashize amezi umunani guhera mu kwa cumi na kumwe, twajya kubaza akarere bati ibibazo byanyu tubirimo bakatubwira ko ku itariki 25 z’umwaka wa 2016 aribwo twagombaga kwishyurwa ariko ubu twaheze mu gihirahiro’’.

Uku ni nako uwitwa Ayingeneye Valentine avuga ati “Njyewe nari ntuye muri Gitega noneho uyu muhanda ugwa mu nzu yanjye barayisenya ngo bazatwishyura amafaranga kugeza n’ubu ntabwo bari bayaduha byabaye mu kwezi kwa cumi na kumwe muri 2016 batubwira ko bazayaduha mu kwezi kwa mbere ariko kugeza n’ubu iyo tubajije bagenda baturerega,mbese twabuze aho tubariza nkanjye bari barambariye milliyoni eshatu n’igice (3.500 000Frw) kandi n’imyaka yanjye bayiranduye itari yera”.

Umuyobozi w’akarere ka Rutsiro wungirije ushinzwe iterambere ry’Ubukungu, Munyakazi Gakuru Innocent, yavuze ko kuba abaturage babona amafaranga yabo ari uburenganzira bwabo kandi ahamya ko abambere bamaze kuyabona ndetse na bake basigaye bari hafi kubona amafaranga yabo.

Yagize ati "Mu by’ukuri abaturage bafite ikibazo cyo kubona ingurane basigaye ari bake kuko abenshi bamaze guhabwa amafaranga ndetse n’abo basigaye wenda naza kubaza ababishinzwe aho babigejeje ariko nijeje abaturage ko mu gihe cya vuba baraba babonye ingurane bose kandi bihangane".

Anaclet NTIRUSHWA//Umubavu.com



Tanga igitekerezo kuri iyi nkuru



Igitekerezo