Rusizi:Umusore yakubise agafuni ababyeyi be ashaka kubanogonora,Imana ikinga akaboko

Egide Habiyaremye utuye mu karere ka Rusizi mu murenge wa Gitambi mu kagari ka Cyingwa yakubise ababyeyi be akoresheje ifuni agamije kubica ariko Imana ikinga akaboko,ntibapfa n’ubwo yabasize ari indembe bakaba barwariye mu bitaro bya Butare na Kigali .

Ku cyumweru tariki ya 13 Kanama 2017,nibwo iri shyano ryakozwe n’uyu musore witwa Egide Habiyaremye,mu gushaka kumenya icyateye iri shyano umunyamabanga Nshingwabikorwa w’Umurenge wa Gitambi Emmanuel Habimana yabwiye itangazamakuru ko uyu musore avuga ko ababyeyi be Paul Karuhije na Marceline Mukamunazi bari baramuroze.

Ubwo uyu musore yabakubitaga,aba babyeyi baratabaje ku bw’amahirwe ababatabaye basanga bagihumeka bajyanwa ku kigo nderabuzima cya Mibirizi ariko kubera ko bari bakomerekejwe bikomeye cyane bahita boherezwa ku bitaro bikuru.

Ise w’uyu muhungu,Paul Karuhije yajyanywe ku bitaro bya CHUB i Butare naho umukecuru we ajyanwa ku bitaro bya CHUK i Kigali kuko bombi bamerewe nabi.

Naho Jean Bosco Nsengimana umuvandimwe w’uyu musore wakubise aba babyeyi avuga ko uyu musore Egide wakoze aya mabi yashakaga ko aba babyeyi bapfa ngo agumane inzu yabo.

Yagize ati “Igihe cyose yabameneshaga akabasohora mu kazu kabo,hari n’undi mukuru we yakubise ubuhiri,bamuhaye umunani we ariko yanga kubaka ahitamo kugumana n’ababyeyi ngo nibasaza azagumane inzu twabubakiye”.

Amakuru dukesha Umuseke avuga ko umuvugizi wa Police Iburengerazuba avuga ko uyu musore yari asanzwe azwiho gukora ibikorwa by’ubugizi bwa nabi mu itsinda ryitwa "Ibihazi" bakoresha kandi n’ibiyobyabwenge.

Umuvugizi wa Police yasoje asaba abaturage kwirinda urugomo no gutanga amakuru ku bashobora kurukora no ku makimbirane yavamo ibikorwa nk’ibi.

Egide Habiyaremye wari wishe ababyeyi be akoresheje ifuni ubu afungiye kuri station ya Police ya Nyakabuye.

Ababyeyi b’uyu musore aribo Paul Karuhije w’imyaka 83 na nyina Marceline Mukamunazi w’imyaka 70 bageze mu zabukuru,uyu Egide Habiyaremye niwe mwana wabo muto akaba ari nawe washaka kubahitana ngo asigarane inzu babamo.

Yanditswe na Anaclet NTIRUSHWA



Tanga igitekerezo kuri iyi nkuru



Igitekerezo