Rusizi:Abahinzi b’umuceri  bacibwa amafaranga yo gushyikigikira amatora y’Umukuru w’Igihugu

Abahinzi b’umuceri mu Karere ka Rusizi bagiye bumvikana ko babuze aho bagurisha umusaruro wabo gusa kuri ubu nyuma yo gukorerwa ubuvugizi n’Itangazamakuru ngo umusaruro wabo wabonye abaguzi ariko ngo bafite ikindi kibazo kibabangamiye kuko buri muhinzi yagiye acibwa amafaranga y’u Rwanda 1000 cyangwa se 1500 babwirwa ko ari ayo gushyigikira amatora y’Umukuru w’Igihugu kandi aya matora yararangiye.

Umwe ati’’Batubwiye ko bazadukuraho amafaranga ya gushyigikira amatora ariko ntibarubwira ngo ni angahe ’’

Undi muhinzi avuga ko abayobozi b’amakoperative babarizwamo bakagombye kubabwira bakabakoresha inama bityo bakamenya impamvu y’aya mafaranga.

Undi avuga ko bababwiye ko nibajya kubarisha bazakurwaho amafaranga yo gushyigikira amatora y’Umukuru w’Igihugu ariko ngo ntiyibaza uburyo byaba kandi hari n’andi batanze ku bantu bagiye ababasanga mu ngo zabo.

Undi avuga ko yasaruye umuceri agiye gufata amafaranga y’umuceri yari yagurishije agasanga baramukuyeho 1500 bamubwira ko ari ayo gushyigikira amatora y’Umukuru w’Igihugu.

Aba bahinzi bavuga ko batiyumvisha ukuntu baba bagitanga amafaranga y’amatora kandi yararangiye dore ko nta rwandiko bahabwa rusinyweho na Komisiyo y’Amatora ku buryo bakwemeza ko koko aya mafaranga ajya muri iyi Komisiyo.

Nubwo bitoroshye kubona urwego urwo arirwo rwose rwakwemeaza ko aya mafaranga yakwa abahinzi ,Umuyobozi wa Koperative y’abahinzi b’umuceri bo mu Murenge wa Nyakabuye,Emmanuel Harerimana yabwiye Radio/Tv1 dukesha iyi nkuru ko aya mafaranga atari ayo gutera inkunga amatora ahubwo ari ayo kubaka inzego z’ubuyobozi .

Ati’’Aya mafaranga ni umusanzu wo kubaka urwego rukuriye amakoperetive y’abahinzi b’umuceri mu Rwanda hose(FICORIRWA), ni ibintu bisaznwe bizwi, byakorewe amanama barabitumenyesha , bituma tubishyira mu bahinzi ko ayo mafaranga agomba gutangwa nyanze bikunze kandi ndumva nta kibazo biteye ’’.

Usibye kuba aba bahinzi b’umuceri bo mu Karere ka Rusizi basaba ko bazajya basobanurirwa niba koko amafaranga batanga ari ayo gushyigikira amatora yarangiye, banasaba ko ubutaha inzego z’ubuyobozi zajya zibafasha zikabashakira abaguzi mu maguru mashya mbere y’uko imicero yabo yangirikira ku bibuga.

Gabriel Habineza/Umubavu.com



Tanga igitekerezo kuri iyi nkuru



Igitekerezo