RCS yateye utwatsi ibivugwa n’Ishyaka FDU ko Ingabire Victoire amaze iminsi 7 atarya

Ubuyobozi bwa za gereza burahakana ibikubiye mu itangazo ryishyizwe ahagaragara n’Ishyaka rya FDU Inkingi ritemewe na leta mu Rwanda rivuga ko umuyobozi waryo Victore Ingabire amaze iminsi irindwi atarya.

Justin Bahunga, umuvugizi wa FDU ku mugabane w’Uburayi, avuga ko ngo madamu Ingabire atemerewe kugemurirwa kuko abamugemuriraga batawe muri yombi na polisi.

Victoire Ingabire ngo agomba kugemurirwa ibyo arya kubera uburwayi bw’igifu butuma adashobora kurya ibyo abandi banyururu bose barya.

Hashize iminsi polisi y’u Rwanda ifashe abayoboke barindwi ba FDU Inkingi ibarega gukorana n’umutwe witwaje intwaro ukorera mu gihugu cy’amahanga.

Muri abo barindwi bafashwe ngo harimo uwahoraga agemurira Ingabire, akaba ariyo mpamvu kugeza ubu atari bwagemurirwe.

Bwana Bahunga yavuze ko muri iyo minsi irindwi ishize batazi icyo Victoire arimo arafungura, bakaba bafite ubwoba bw’uko yaba agiye kwicwa n’inzara.

Abashinzwe gereza ngo nta kibazo gihari

Ariko ubuyobozi bwa gereza bwo buvuga ko Ingabire ata kibazo afite ngo kuko arimo agaburirwa na gereza mu gihe uwumugemurira wundi ataraboneka.

Umuvugizi w’ubuyobozi bwa gereza, Hilary Sengabo, yabwiye BBC ko Ingabire amaze gutanga amazina y’uwundi muntu azajya amugemurira ngo ariko ntaraza kwakira ibyangombwa.

Ngo Victoire Ingabire nta kibazo cy’inzara afite ngo kuko ubu yitaweho na gereza mu gihe atari we wenyine ufunzwe ufite ingaburo yihariye.

Victoire Ingabire, umukuru w’ishyaka FDU Inkingi ritaremererwa gukorera mu Rwanda, yakatiwe gufungwa imyaka 15 muri 2013 ahamijwe ibyaha birimo kwangisha abaturage ubutegetsi.

Gabriel Habineza/Umubavu.com



Tanga igitekerezo kuri iyi nkuru



Igitekerezo