Pasteri Barore yahamagariye abakristo guhanga amaso kubitaboneka

Kuri icyi cyumweru Pasteri Barore Cleophas yahamagariye abakiristo ba ADEPR Nyarugenge guhanga amaso ku bitaboneka,bakizera Imana kandi bakayitegereza bizeye ko izabagororera,bakareka kuba nk’ibikenya bitumva ihoni. 

Pasteri Barore yavuze ko ibyatuma abantu bava ku Mana ari byinshi,ariko na none ahamagarira abantu ko bakwiriye kugumisha icyizere kuri Yesu Christo bizeye kuko nubwo byatinda ngo birashyira bigasohora maze ibyifuzo by’umuntu bigasubizwa.

Yatanze urugero rw’uko yigeze gukena kandi afite akazi,yajya gusenga Imana ikamubwira ko izamusubiza ariko nyamara bigatinda ku buryo iyo ataza kugumisha icyizere ku ijambo yari yarabwiwe n’Imana yashoboraga kuba yarabivuyemo.

Yagize ati :"nigeze gukena bikomeye maze ngiye gusenga mpurirayo n’abandi basore maze barampanurira bati Imana imanukanye ikiaho cyanditseho ngo uratabawe,mu by’ukuli sinari mbonye ibyo nashakaga ariko byibura natahanye iryo jambo kandi nkomeza kuryizera kugeza aho yaje kuntabara".

Yakomeje avuga ati :"ibyavana umuntu ku Mana ni byinshi,uhuye n’umuntu wibiwe telefone ye mu rusengero (hagati aho muzikomereho) wamubwira ute ko mu rusengero bakizwa ? uramutse uhuye n’uwahutajwe n’abapastori cyangwa abadiyakoni,uwo muntu wamubwira ute ko mu rusengero habaho abakizwa ? Icyakora nimurebe ku bitaboneka nk’uko petero yabwiwe na Yesu ngo najugunye urushundura rwe mu mazi maze arobe nyamara ariko akamubwira ati twakesheje ijorao ryose turoba nyamara ntacyo twaronse,ariko kuko ari wowe ubivuze reka tubikore maze bagaherako baroba ifi nyinshi cyane zivuye mu kwizera no kugendera ku ijambo rya Yesu Christo".

Namwe nimureba ku bitaboneka mukamenya ko mukwiriye kwiyeza no gukora ibyiza,nta kabuza Imana irebera hose icyarimwe izabakorera ibihwanye n’ibyo mwifuza.

Barore Cleophas ni umunyamakuru wa Radio na Television y’u Rwanda,kuwa 24 Werurwe 2012 nibwo yahawe inkoni y’ubushumba, kugeza ubu akaba ari umupasteri kuri ADEPR Paroise ya Remera mu ishami ry’icyongereza n’igifaransa,ni umugabo utuye kinyinya ,afite umugore n’abana 6,abakobwa 3 n’abahungu 3,ni umugabo kandi benshi badashidikanyaho bitewe n’ijwi rye,uburyo anyuzamo agasetsa abantu ari nabyo bimufasha kwigarurira no kuganza imitima y’abatari bake.

Yanditswe na Anaclet NTIRUSHWA



Tanga igitekerezo kuri iyi nkuru



Igitekerezo