Odinga yahawe gasopo kuri gahunda yo kurahirira kuyobora Kenya

Kuri uyu wa kabiri tariki ya 05 Ukuboza 2017 mu nama yahuje umukozi wa Amerika ushinzwe ibikorwa bya Afurika, Donald Yamamoto, yamuhaye gasopo kuri gahunda aheruka gutangaza avuga ko nyuma y’irahira rya Uhuru Kenyatta nawe azarahirira kuyobora Kenya ku wa 12 Ukuboza 2017 kuko bishobora kugarura igihugu mu kaga.

Nyuma yuko ku wa Kabiri tariki 28 Ugushyingo 2017, Uhuru Kenyatta wegukanye intsinzi mu matora yasubiwemo ku itariki ya 26 Ukwakira 2017, Umuyobozi w’amashyirahamwe n’amashyaka atavuga rumwe n’ubutegetsi mu gihugu cya Kenya, Raila Odinga nibwo nawe yahise ayangaza ko nawe azarahirira kuyobora igihugu ku itariki ya 12 Ukuboza, umunsi igihugu kizaba kiri mu birori byo kwizihiza imyaka 53 kibonye ubwigenge.

Mu nama yabaye kuri uyu wa kabiri, umukozi wa Amerika ushinzwe ibikorwa bya Afurika, Donald Yamamoto yasabye Raila Odinga kuburizamo iyi gahunda yatangarije abayoboke be yo kurahirira kuyobora igihugu kuko cyabonye umuyobozi ku mugaragaro nkuko byemejwe n’urukiko rukuru ruyobowe na David Maraga.

PNG - 499.1 ko
Donald Yamamoto, umukozi wa Amerika ushinzwe ibikorwa bya Afurika


Uyu muyobozi w’ishyaka ritajya ricana uwaka na Leta ya Kenya (National Super Alliance, NASA), kugeza ubu avuga ko atemera ibyavuye mu matora yasubiwemo nyuma yuko ayikuyemo avuga ko atazaba mu mucyo ndetse atujuje ibisabwa, bikanavugwa abaturage bagera kuri 80% batayitabiriye cyane cyane abashyigikiye uyu munyapolitiki.

Ikinyamakuru TUKO cyanditse ko cyamenye amakuru ko iyi nama yitabiriwe na Odinga n’abayobozi batandukanye bafatanyije kuyobora ishyaka ryabo rya NASA barimo Wetangula, Musalia Mudavadi na Kolonzo Musyoka.

PNG - 388.3 ko
Odinga utaremera ko Uhuru Kenyatta ariwe Perezida wa Kenya


Raila Odinga yabwiye Uhuru Kenyatta ko nubwo yarahiriye kuyobora igihugu cya Kenya, ubuyobozi bwe ntawubuzi ashingiye ko hari abaturage bo mu mpande zitandukanye z’igihugu batamutoye ari nayo mpamvu bashaka ubutabera bunoze kuri ibi bo bita ikibazo mu ishyaka ryabo.

Odinga mu magambo ye yagize ati “Uhuru nubwo yibwira ko yarahiriye kuyobora igihugu, igice kinini cy’abaturage b’igihugu cya Kenya, ntibazi ubuyobozi bwe. Iyi niyo mpamvu ituma dushaka ubutabera bunoze”.

Uretse n’uyu mukozi wa Amerika ushinzwe ibikorwa bya Afurika, Na Perezida Trump yaburiye Odinga amubuza kutazarahira kuko bishobora gushyira igihugu mu bibazo bikomeye. Igisigaye ni ugutegereza niba koko Raila Odinga azarenga kuri ibi byose akarahirira kuyobora Kenya.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo