Nzamuye amaboko hejuru nshima Imana ko ubu nidegembya: Umunyamakuru Ntamuhanga Cassien watorotse gereza

Mu kiganiro yagiranye na Radiyo Ijwi rya Amerika mu gitondo cyo ku wa Gatatu tariki ya 28 Gashyantare 2018, nibwo Ntamuhanga yahamije ko ibyatangajwe ari ukuri, ko yatorotse gereza ndetse ko kuri ubu ashimira Imana ko kuri ubu yidegembya dore ko we ashimangira ko ntacyo yari afungiye.

Ntamuhanga Cassien, umwe mu bareganwaga na Kizito Mihigo bagahamwa n’ibyaha birimo ibyo kurema umutwe w’abagizi ba nabi, n’ubugambanyi bwo kugirira nabi ubutegetsi buriho, nyuma y’amezi ane atorotse gereza ya Mpanga mu karere ka Nyanza, yari afungiyemo, avuga ko ubu yidegembya, anashimana Imana.

Mu kiganiro yagiranye na Radiyo Ijwi rya Amerika mu gitondo cyo ku wa Gatatu tariki ya 28 Gashyantare 2018, nibwo Ntamuhanga yahamije ko ibyatangajwe ari ukuri, ko yatorotse gereza, agashimangira ko ntacyo yari afungiye.

PNG - 843.2 kb
Ntamuhanga Cassien, umwe mu bareganwaga na Kizito Mihigo ariko we wamaze gutoroka Gereza


Ati “Ndiho rwose ndidegembya, ngirango amezi amaze kuba ane nsohotse muri gereza ndetse mbasha no gusohoka mu gihugu, ubu rwose urumva mbese ndimo ndavuga, ndimo ndidegembwa rwose nshima Imana cyane nzamuye amaboko hejuru”.

Uyu mugabo wahoze ari umunyamakuru ari n’Umuyobozi wa Radio Amazing Grace(Ubuntu butangaje) yatawe muri yombi mu 2014 ashinjwa guhungabanya umutekano w’ igihugu we hamwe na Kizito Mihigo ndetse na Jean Paul Dukuzumuremyi.

Mu rubanza rwasomwe mu 2015, Cassien, Kizito na Dukuzumuremyi bahamwe n’ibyaha byo kurema umutwe w’abagizi ba nabi, n’ubugambanyi bwo kugirira nabi ubutegetsi buriho.

Umuhanzi Kizito yakatiwe gufungwa imyaka 10, Ntamuhanga Cassien akatirwa imyaka 25 y’igifungo naho Jean Paul imyaka 30.

PNG - 902.8 kb
Umunyamakuru Ntamuhanga Cassien yari yakatiwe igifungo cy’imyaka 25


Abajijwe n’umunyamakuru wa Radiyo Ijwi rya Amerika ko yaba ashakishwa mu gihe yatorotse gereza atarangije igifungo cye, yamusubije avuga ko yari yarafungiwe ibyaha atakoze.

Yagize ati “Njyewe nta cyaha na kimwe kera cyangwa kirabura nishinja, kuko n’ababashije gukurikirana urubanza rwanjye ndetse batabogamye, babasha kumva ko ibintu naziraga nanjye nkomeje kwicara muri gereza, na njye mu gihe cyose naba nkifite umwuka, nanjye kwaba ari ukwifunga”.

Akomeza avuga ko yakoze ibishoboka byose abasha guca mu rihumye abashinzwe kurinda gereza, aratoroka, ati “Yaba abashinzwe kurinda gereza nabaciye mu rihumye ndabacika yewe n’abashinzwe kurinda igihugu cyose”.

Mu gihe iki gitangazamakuru kidatangaza aho uyu Ntamuhanga aherereye ku bw’umutekano we, atangaza ko igihugu aherereyemo afite ibyangombwa byose bigenerwa izindi mpunzi.

Ku wa 31 Ugushyingo 2017, nibwo Urwego rushinzwe imfungwa n’abagororwa mu Rwanda(RCS) rwatangaje ko abagororwa batatu barimo Ntamuhanga batorotse mu ijoro ryo ku wa 30 Ugushyingo 2017.

Ntamuhanga Cassien mwene Nyirajanja Raphaie na Nyirabahashyi, ukomoka mu Kagari ka Kabeza mu Murenge wa Muhima ho mu karere ka Nyarugenge, yatorokanye na Sibomana Kirege, mwene Subwumwe na Nyiramiheto, ukomoka mu kagari ka Birushya Umurenge Nyamyuba mu Karere ka Rubavu na Batambarije Theogene ukomoka mu Kagari ka Rwambongo, Umurenge wa Gatebe mu karere ka Burera.

Daniel MUKESHIMANA/Umubavu.com


Travel for Free!


Tanga igitekerezo kuri iyi nkuru



Igitekerezo