Nyuma yo kuba umukozi wo mu rugo ubu ni umuherwe

Tashitaa Tufaa wari warahungiye muri Leta Zunze Ubumwe za Amerika avuye iwabo muri Ethiopia aho yari yirukanwe azira guharanira ukwishyira ukizana kw’agace yari atuyemo ka Oromia yatangiriye ku kazi ko koza ibyombo ndetse n’akandi kose abonye muri Amerika none ubu arabara amamiliyoni nk’abandi baherwe bose.

Tashitaa Tufaa wahungiye muri Leta Zunze Ubumwe za Amerika n’ubusanzwe yari afite inzozi zo kuzakandagira ku butaka bw’iki gihugu cy’igihangange ku isi, ubungubu arabara amamiliyoni nyuma yuko akabije inzozi ze zo kugera muri Amerika nubwo yagiye mu buryo atari yateguye gusa ntibyamubujije kugerayo ngo akure amaboko mu mufuka akore akazi ako ari ko kose atarobanuye. Yahungiye muri Amerika nyuma yo kumererwa nabi iwabo muri Ethiopia azira guhirimbanira ukwishyira ukizana kw’agace yavukagamo ka Oromia.

Bwa mbere akandagira ku butaka bwa Amerika avuye iwabo muri Ethiopia mu mwaka wa 1992 yahitiye mu gace ka Minneapolis. Mu kiganiro yagiranye n’Ijwi rya Amerika (VOA) yagize ati “nari umunyapolitiki ariko ufatwa nk’utaravukiye muri Ethiopia. Sinigeze na rimwe nkunda cyangwa ngo nemeranywe na Leta ya Ethiopia”.

Yatangiye yoza ibyombo kuri Hilton Hotel ahembwa amadolari 5.65 (Hafi ibihumbi 5000 mu manyarwanda) ku isaha imwe. Si aka kazi yacungiragaho gusa kuko yari n’umusekirite ndetse rimwe na rimwe agakora n’ibindi biraka abonye.

Igitangaje nuko Tashitaa Tufaa yakoze aka kazi kose aniga aho yaje kubona impamyabubenyi ya Master’s muri Kaminuza ya Minnesota mu ishami ry’ubumenyi muri politiki n’ububanyi n’amahanga.

Bitewe nuko Tashitaa Tufaa yari afite uruhushya rwo gutwara ibinyabiziga, yaje kugera aho akunda ubwikorezi cyane. Yagize ati “iki ni igisubizo cyange rwose ubu ndumva nkunze ubwikorezi cyane ko najya nanitwarira nta mushoferi wundi nkoresheje”.

Nyuma y’imyaka mikeya Tashitaa Tufaa yaje kuba uwikorera ku giti cye anashinga kampani ikomeye y’ubwikorezi yitwa “Metropolitan Transportation Network”ifite imodoka zisaga 300 zose. Mu byo akora harimo no gutwara abanyeshuri bajya ku mashuri.

Tashitaa Tufaa ntiyigeze acika intege mu kazi yakoraga nubwo yagiye ahura n’ibibazo. Mu magambo ye ati”sinigeze ncika intege na gato cyane ko hari icyo nashakaga kugeraho. Impano iruta izindi mu buzima nawe waraga umuntu ni ugukora nkuko nange ari byo byangejeje aho ndi ubu”.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo