Nyarutongo:Umusirikare yarashe mugenzi we arapfa

Umusirikare mu ngabo z’Uburundi witwa NDAYIZEYE mu ijoro ryo ku Cyumweru rishyira ku wa Mbere tariki 14 Kanama 2017 ,yarashwe na mugenzi we arapfa maze uwamurashe ahita ahungira muri Tanzania.

Ibi bikaba byarabereye ku birindiro by’Igisirikare cy’u Burundi biri mu gace ka Nyarutongo ,Komini ya Giteranyi ho mu Ntara ya Muyinga nk’uko byatangajwe na bimwe mu binyamakuru byandikirwa mu Burundi.

Amakuru ava mu ntara ya Muyinga avuga ko uyu musirikare yishwe na mugenzi we uri ku rwego rwa Caporal uzwi nka Mugabo waje guhunga imyenda ye n’imbunda yari afite bikaba byaratoraguwe mu shyamba ryegereye aho yarasiye Ndayizeye.

Amakuru akomeza avuga ko Mugabo nyuma yo kwica mugenzi we yaba yarahise ahungira mu gihugu cya Tanzania.

Amakuru ava mu gisirikare cy’u Burundi avuga o icyatumye Mugabo yica mugenzi we
kizamenyekana ari uko amaze gufatwa.

Gabriel Habineza/Umubavu.com



Tanga igitekerezo kuri iyi nkuru



Igitekerezo