Nyanza:Barafungwa abandi bagakubitwa bazira kutishyura Mituelle

Abaturage bo mu Kagari ka Kirambi ,Umurenge wa Nyagisozi ho mu Karere ka Nyanza bataratanga ubwisungane mu kwivuza baravuga ko babangamiwe n’uburyo ubuyobozi bw’inzego z’ibanze bubabyutsa mu ijoro bukabajyana kwirirwa zibicaje hamwe ngo ni uko batatanze mituelle.

Aba baturage bavuga ko uretse kubyutswa igicuku ngo hari n’abakurwa mu mirima bakajyanywa bakirirwa bagendanwa sibyo gusa ngo hari n’abakubitwa.

Aba baturage kandi bashimangira ko gutanga Mituelle batabyanze ariko ko bitaba agahato ku buryo byageza aho umuntu anakubitwa.

Nk’uko bitangazwa n’Umunyamabanga Nshingwabikorwa w’Umurenge wa Nyagisozi, Alfred Nsengiyumva yabwiye Radio/TV1 dukesha iyi nkuru ngo abafatwa ni abagendera ku mahame y’idini ababuza kwishyura ubwisungane cyakoze ngo iyo bagejejwe ku Murenge bakigishwa bemera kuyatanga.

Ati’’ Hari abo twagiye dufata b’Abayehova bavuga ko batazishyura Mituelle ko ibyo ngibyo byaba ari amashyirahamwe kandi mu myemerere yabo byaba ari ibintu bijyanye na Anti-Christ ‘’

Uyu muyobozi avuga ko icyo bakora ari ukubengeranya bababigisha ndetse ko hari n’Abo mu Itorero ry’Abadive bari banze kwishyura mituelle bavuga ko izazamo imibare 666 gusa ngo nyuma babagejeje ku Murenge baje kwemera kwishyurirwa.

Nsengiyumva akomeza avuga ko ku bandi baturage hagiye haba amanama mu tugari abashishikariza gutanga ubwisungane mu kwivuza.

Mu nama aherutse kugirana n’abayobozi b’inzego z’ibanze bo mu Ntara y’Amajyepfo ,Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza y’abaturage,Dr Alivera Mukabaramba yabasabye kudakoresha ingufu mu kwaka abaturage umusanzu wo kwivuza ahubwo hagashyirwaho ubukangurambaga hadahutajwe abaturage cyangwa ngo bafatirwe ibyo bajyanye mu masoko.

Gabriel Habineza/Umubavu.com



Tanga igitekerezo kuri iyi nkuru



Igitekerezo