Nyabugogo : Imirwano ikaze  hagati y’abazunguzayi, abanyerondo  na Dasso

Ku mugoroba wo kuwa Kane tariki ya 10 kanama, muri gare ya Nyabugogo habaye imirwano itoroshye hagati y’abakora akazi ko gucururiza mu muhanda, abashinzwe irondo ry’isuku ndetse na Dasso.

Abaturage babonye iyi mirwano bavuga ko yatewe n’uko abashinzwe irondo ry’isuku basabye amafaranga uwacuruzaga utuntu mu ndobo kugira ngo batamufata akayabima bigatuma barwana abari muri gare bose bagahurura buri wese akubita uwo abonye ndetse n’amabuye akavuza ubuhuha.

Umwe mu bakorera Nyabugogo waganiriye na loyal Tv dukesha iyi nkuru yagize ati”Abanyerondo b’isuku bari bavuye kunywa inzoga hanyuma babonye uriya musore wacuruzaga udusambusha mu ndobo bamwaka amafaranga 500 arayabima, bongeye guhura ibyo yacuruzaga yabimaze barongera barayamwaka arayabima batangira kurwana ubwo.”

Aba baturage bavuga ko babangamiwe cyane n’uburyo izi nzego z’umutekano zabashyiriweho zikora n’uko zibafata kuko hari n’igihe zihohotera abagenzi kandi nta cyo bazira kuko zipfa gusagarira uwo zibonye wese.

Undi muturage yagize ati”hari igihe umugenzi utabimenyereye abona bakubita umuntu yabaza uko bigenze na we bagahita bamwadukira batitaye ku wo ari we cyangwa icyo ari cyo bakamukubita”

Aba bazunguzayi kandi bavuga ko batazi neza uko ibihano bacibwa biteganywa kuko usanga banabaha fagitire z’ibinyabiziga kandi bo badatwara ibinyabiziga.

Umwe yagize ati’ujya kubona ukabona bakwandikiye konterivasiyo wareba n’amafaranga ariho ukibaza icyo ugiye kwishyura bikakuyobera, bakwemeje ko ari amande bakandikaho amande ntibandikeho konterivasiyo ko tutari ibinyabiziga.”

“Abazunguzayi twabaye bobo, baragufata bakumva ko bongeye bariye kuko ruswa banayise umurengezi. Bakwinjiza mu nzu ya bo abandi bakubona bakavuga ngo karibu kiriya (Client), twabaye abakiriya kuko baduca amafaranga uko biboneye.”

Bavugira icyarimwe, aba bazunguzayi bavuga ko abanyerondo b’isuku babakubitira mu biro bya bo ndetse bakabacuza utwo bafite twose, kubambika ubusa, ndetse bakanavuga ko hari abagore bakuramo inda kubera inkoni baba bakubiswe n’aba banyerondo.

Umwe yagize ati”Baragufata bakaguhondagura, ntibagira isoni zo kukwambika ubusa amabere ugasanga ari hejuru ndetse n’abagenzi bigendera barabakubita,…

Ni kenshi aba bakozi bambaye imyenda y’akazi bashyirwa mu majwi n’abantu batandukanye ku mikorere ya bo idahwitse, aho usanga bashinjwa gukubita no gukomeretsa ndetse no kwambura.



Tanga igitekerezo kuri iyi nkuru



Igitekerezo