Nigeria : Umusirikari wari uyoboye ibikorwa byo kurwanya Boko Haram yirukanywe

Igisirikare cyo mu gihugu cya Nigeria cyirukanye ku mirimo ye, General Major Ibrahim Attahiru wari uyoboye igikorwa cyo kurwanya intagondwa zo mu mutwe wa Boko Haram mu majyaruguru y’igihugu.

Iyirukanwa ry’uyu mujenerali wari warahawe ako kazi mu kwezi kwa gatanu kuje gukurikira ibitero izo ntagondwa zimaze ibyumweru zigaba.

Ubuyobozi bw’igisirikare cya Nigeria ntabwo bwigeze butanga ibisobanuro birambuye ku kintu cyaba cyatumye General Major Ibrahim Attahiru avanwa kuri uwo mwanya.

Nubwo nta mpamvu iragaragazwa yatumye uyu musirikari yirukanwa, abakurikiranira hafi ibibera muri Nigeria baravuga ko ibi bishobora kuba bifite aho bihuriye n’ibitero biheruka bya Boko Haram mu majyaruguru y’uburasirazuba bw’igihugu birimo n’icyahitanye abantu basaga 50 mu musigiti wo mujyi wa Mubi mu ntara ya Adamawa.

Umuvugizi w’igisirikare cya Nigeria yabwiye BBC ko General Attahiru yahawe akandi kazi ku biro bikuru by’igisirikare mu mujyi wa Abuja.

Yasimbuwe na General Nicholas Rogers uherutse kuyobora igikorwa gihuriweho n’igipolisi n’igisirikare mu karere gakunze kuvugwamo ibikorwa byo gukozanyaho bishingiye ku moko hagati mu gihugu.

PNG - 622.6 ko
General Major Ibrahim Attahiru wirukanywe ku mirimo ye agahabwa izindi nshingano

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo